Тошкент шаҳридаги конгресс холлда Ўзбекистондаги MTO технологияси асосида ишловчи газ-кимё комплекси ва Air Products компанияси ўртасида газни саноат даражасида қайта ишлаш тўғрисидаги битимни имзолаш маросими бўлиб ўтди.
Энергетика вазирлиги маълумотига кўра, “Метанол ороли” номи билан танилган ушбу иншоот йилига 1,34 миллион тонна қувватга эга бўлади ва Ўзбекистонда метанолдан олефин ишлаб чиқариш бўйича газ-кимё комплекси таркибига киради.
Ўзбекистоннинг Бухоро вилояти Қоракўл туманидаги эркин иқтисодий зона ҳудудида бунёд этилажак завод 15 гектар майдонни эгаллайди. Заводни 2025 йилда ишга тушириш мўлжалланган бўлиб, эксплуатация муддати 25 йил.
Табиатга зиён етказиш даражаси юқори бўлган кўмирдан фойдаланадиган бошқа MTO корхоналаридан фарқли ўлароқ, дунёдаги илғор инновацион технологиялар асосида ишлайдиган Ўзбекистондаги MTO газ-кимё комплекси мамлакатда қазиб олиниб, қўшилган қиймат кўрсаткичлари паст бўлган табиий газни юқори даражадаги қўшилган қийматга эга бўлган полимер маҳсулотларини ишлаб чиқариш мақсадида чуқур қайта ишлаш учун мўлжалланган бўлиб, йилик ишлаб чиқариш қуввати 1 110 000 тоннадир.
MTO газ-кимё комплексида полипропилен, паст зичликдаги полиэтилен, этиленвинилацетат, полиэтилен терефталат, юқори зичликдаги полиэтилен сингари маҳсулотлар ишлаб чиқарилиши режалаштирилган.
Маҳаллий ишлаб чиқариш Ўзбекистонга иқтисодиётни диверсификациялаш, импортнинг ўрнини босиш ва маҳсулотларни бошқа минтақаларга экспорт қилиш борасидаги мақсадларга эришишга ёрдамлашади.
Метанол заводи метанол, водород ва бошқа саноат газлари, хусусан, кислород ва азот кабиларнинг барқарор етказиб берилишини таъминлаб, улар MTO газ-кимё комплексининг ишлаб чиқариш жараёнлари учун муҳим аҳамият касб этади.
“Биз дунёда саноат газларини ишлаб чиқариш соҳаси етакчиси бўлган Air Products компанияси билан ҳамкорлик қилишдан мамнунмиз. Air Products юқори сифат ва талаб қилинадиган маҳсулот ҳажмини кафолатлай оладиган, самарадорлиги исботланган ечимларнинг ишончли таъминотчиси сифатида ўзини намоён қилиб улгурган.
Компания инвестициялари халқаро ишлаб чиқарувчиларнинг Ўзбекистондаги саноат ривожланиши билан боғлиқ имкониятларга бўлган қизиқиши юқори эканини намойиш этади”, — деди MTO газ-кимё комплекси бош директори Масрур Шакиров.
Завод қурилиши якунлангач, Methanol Island ҳудудида водород, кислород ва азот ишлаб чиқариладиган водород ишлаб чиқариш ва ҳаво ажратиш қурилмалари, синтетик газ ишлаб чиқариш ва уни метанолга айлантириш учун мўлжалланган метанол қурилмаси ишлаб чиқариш қувватлари жойлашади.
Изоҳ (0)