Тошкент шаҳрида Сингапур президенти Ҳалима Яқубнинг Ўзбекистонга ташрифи арафасида бўлиб ўтган Ўзбекистон—Сингапур бизнес-форуми доирасида Uzbekistan Airports бошқаруви раиси Раъно Жўраева ҳамда Changi Airports бош директори Юджин Ган ўртасида келишувлар бўлиб ўтди. Бу ҳақда Uzbekistan Airports матбуот хизмати хабар берди.
Раъно Жўраеванинг сўзларига кўра, Тошкент Европа ва Осиёни боғлай оладиган халқаро марказ сифатида улкан экспорт салоҳиятига эга. Аммо мавжуд аэропортнинг кўплаб чекловлари бор, чунки пойтахтнинг ривожланиши билан у деярли шаҳар марказида бўлиб қолди.
“Йўловчилар оқимини таҳлил қилиб, биз ўсиш жараёни жуда тез деган хулосага келмоқдамиз. Бугунги кунда, тиғиз соатларда терминаллар йўловчиларни деярли сиғдира олмай қолмоқда ва самолётлар учун тўхташ жойлари ҳам етарли эмас. Шу боис янги аэропорт қуриш масаласи устида ишлаяпмиз. Маслаҳатчилар сифатида биз дунёдаги энг илғор аэропорт — Changi Airports International‘ни таклиф қилдик. Уларнинг вазифаси халқаро хаб яратиш ва янги ҳаво бандаргоҳини қуришда энг замонавий аэропорт технологияларидан фойдаланишни ҳисобга олган ҳолда техник-иқтисодий асослашни ишлаб чиқишда бизга ёрдам беришдан иборат. Шу билан бирга, CAI вакиллари бир вақтнинг ўзида мавжуд аэропорт фаолиятини авиация ва ноавиацион фаолият нуқтаи назаридан оптималлаштириш бўйича консалтинг билан шуғулланади”, — деди Uzbekistan Airports бошқаруви раиси.
Қайд этилишича, 2022 йилда мамлакат бош ҳаво бандаргоҳида йўловчи оқими 5 миллион йўловчини ташкил этиб, пандемиядан олдинги даврдан ҳам ошиб кетган. 2023 йилда Uzbekistan Airports таҳлилчиларига кўра, 8 миллионга яқин йўловчи кутилмоқда. Битим имзолангандан сўнг томонлар тез орада икки йўналиш бўйича иш бошлайди: мавжуд аэропорт фаолиятини оптималлаштириш, жумладан, йўловчиларга хизмат кўрсатишнинг рақобатбардошлиги ва сифатини ошириш, илғор технологияларни жорий этиш ва йўловчилар оқимини ошириш, шунингдек, янги Тошкент аэропорти лойиҳасининг техник-иқтисодий асосларини ишлаб чиқиш.
“Changi Airports International компанияси Uzbekistan Airports билан ҳамкорлик қилишдан мамнун. Ўзбекистон Марказий Осиё минтақасидаги энг тез ривожланаётган бизнес ва туризм салоҳиятига эга мамлакатлардан биридир. Биз мавжуд Тошкент аэропортининг сиғими, иш стандартлари ва молиявий кўрсаткичларини оптималлаштириш, шунингдек, янги аэропортни ривожлантириш режаларини қўллаб-қувватлаш мақсадида аэропортни ривожлантириш ва бошқариш бўйича тажрибамиз билан ўртоқлашишни интиқлик билан кутмоқдамиз”, — дейди Changi Airports бош директори Юджин Ган.
Шавкат Мирзиёевнинг таклифига биноан Сингапур президенти Ҳалима Яқуб 23 май куни давлат ташрифи билан Ўзбекистонга келганди. У мамлакатга келишда Uzbekistan Airwaysънинг доимий рейсидан фойдаланган.
Олий мартабали меҳмон ва Сингапур делегацияси аъзолари “Янги Ўзбекистон” боғига ташриф буюриб, Мустақиллик монументи пойига гул қўйди, Ўзбекистоннинг истиқлол йилларидаги ривожланиши ва ушбу бетакрор мажмуанинг яратилиш тарихи билан танишди, миллий маданий марказ вакиллари билан учрашди. 24 май куни Кўксаройда Сингапур президентини расмий кутиб олиш маросими бўлиб ўтди. Шунингдек, у Сингапур президенти Ҳалима Яқуб бошчилигидаги делегация Ўзбекистон президенти ҳузуридаги Давлат бошқаруви академиясига ташриф буюрди.
Изоҳ (0)