Андижон, Наманган, Бухоро ва Урганч аэропортлари бошқаруви хусусий секторга топширилади. Бу ҳақда президент Шавкат Мирзиёев иккинчи Тошкент халқаро инвестиция форумида маълум қилди.
“Биз транспорт соҳасида рақобат муҳитини яратишга қаратилган ислоҳотларни давом эттирамиз. Бу йил Андижон, Наманган, Бухоро ва Урганч аэропортлари бошқарувини ҳам хусусий секторга топширамиз. Темир йўл соҳасида ҳам катта ўзгаришларни бошлаяпмиз ва бунда инвесторлар фаол иштирок этишларини сўраб қоламан”, — деди давлат раҳбари.
Шу билан бирга, тез ўсиб келаётган IT, туризм, таълим, тиббиёт каби соҳаларда Ўзбекистон минтақавий хабга айланиб бораётгани ҳам бу йўналишдаги катта имконият экани таъкидланди. Бу йил давлат-хусусий шерикликни жорий қилиш бўйича 14 миллиард долларлик алоҳида дастурлар халқаро молия институтлари кўмагида ишлаб чиқилган. Булар давлат учун муҳим бўлган транспорт, коммунал ва сув хўжалиги, соғлиқни сақлаш каби тармоқларни қамраб олади.
Шунингдек, бу йил Ўзбекистонда давлат мулкини хусусийлаштириш бўйича “1 минг + 1 минг + 40” дастури қабул қилингани айтилди.
Бу 1 мингта корхонадаги давлат улушлари ҳамда яна 1 мингта давлатга тегишли кўчмас мулк объектлари очиқ аукцион савдоларига чиқарилади, иқтисодиётимиз учун стратегик аҳамиятга эга 40 та корхона IPO’га олиб чиқилади дегани. Жумладан, олтин, мис ишлаб чиқарувчи йирик корхоналар, телекоммуникация ва суғурта компаниялари ҳамда банклар акциялари инвесторларга таклиф этилади.
2021 йилда Uzbekistan Airports раҳбари Раъно Жўраева Ўзбекистон томони аэропортларнинг турли элементларини ривожлантириш учун хусусий инвестицияларни жалб этишга тайёрлиги, бу борада давлат-хусусий шерикчилик имкониятларидан кенг фойдаланиш мумкинлигини маълум қилганди.
Изоҳ (0)