Toshkent shahrida Singapur prezidenti Halima Yaqubning O‘zbekistonga tashrifi arafasida bo‘lib o‘tgan O‘zbekiston—Singapur biznes-forumi doirasida Uzbekistan Airports boshqaruvi raisi Ra’no Jo‘rayeva hamda Changi Airports bosh direktori Yudjin Gan o‘rtasida kelishuvlar bo‘lib o‘tdi. Bu haqda Uzbekistan Airports matbuot xizmati xabar berdi.
Raʼno Jo‘rayevaning so‘zlariga ko‘ra, Toshkent Yevropa va Osiyoni bog‘lay oladigan xalqaro markaz sifatida ulkan eksport salohiyatiga ega. Ammo mavjud aeroportning ko‘plab cheklovlari bor, chunki poytaxtning rivojlanishi bilan u deyarli shahar markazida bo‘lib qoldi.
“Yo‘lovchilar oqimini tahlil qilib, biz o‘sish jarayoni juda tez degan xulosaga kelmoqdamiz. Bugungi kunda, tig‘iz soatlarda terminallar yo‘lovchilarni deyarli sig‘dira olmay qolmoqda va samolyotlar uchun to‘xtash joylari ham yetarli emas. Shu bois yangi aeroport qurish masalasi ustida ishlayapmiz. Maslahatchilar sifatida biz dunyodagi eng ilg‘or aeroport — Changi Airports International’ni taklif qildik. Ularning vazifasi xalqaro xab yaratish va yangi havo bandargohini qurishda eng zamonaviy aeroport texnologiyalaridan foydalanishni hisobga olgan holda texnik-iqtisodiy asoslashni ishlab chiqishda bizga yordam berishdan iborat. Shu bilan birga, CAI vakillari bir vaqtning o‘zida mavjud aeroport faoliyatini aviatsiya va noaviatsion faoliyat nuqtayi nazaridan optimallashtirish bo‘yicha konsalting bilan shug‘ullanadi”, — dedi Uzbekistan Airports boshqaruvi raisi.
Qayd etilishicha, 2022-yilda mamlakat bosh havo bandargohida yo‘lovchi oqimi 5 million yo‘lovchini tashkil etib, pandemiyadan oldingi davrdan ham oshib ketgan. 2023-yilda Uzbekistan Airports tahlilchilariga ko‘ra, 8 millionga yaqin yo‘lovchi kutilmoqda. Bitim imzolangandan so‘ng tomonlar tez orada ikki yo‘nalish bo‘yicha ish boshlaydi: mavjud aeroport faoliyatini optimallashtirish, jumladan, yo‘lovchilarga xizmat ko‘rsatishning raqobatbardoshligi va sifatini oshirish, ilg‘or texnologiyalarni joriy etish va yo‘lovchilar oqimini oshirish, shuningdek, yangi Toshkent aeroporti loyihasining texnik-iqtisodiy asoslarini ishlab chiqish.
“Changi Airports International kompaniyasi Uzbekistan Airports bilan hamkorlik qilishdan mamnun. O‘zbekiston Markaziy Osiyo mintaqasidagi eng tez rivojlanayotgan biznes va turizm salohiyatiga ega mamlakatlardan biridir. Biz mavjud Toshkent aeroportining sig‘imi, ish standartlari va moliyaviy ko‘rsatkichlarini optimallashtirish, shuningdek, yangi aeroportni rivojlantirish rejalarini qo‘llab-quvvatlash maqsadida aeroportni rivojlantirish va boshqarish bo‘yicha tajribamiz bilan o‘rtoqlashishni intiqlik bilan kutmoqdamiz”, — deydi Changi Airports bosh direktori Yudjin Gan.
Shavkat Mirziyoyevning taklifiga binoan Singapur prezidenti Halima Yaqub 23-may kuni davlat tashrifi bilan O‘zbekistonga kelgandi. U mamlakatga kelishda Uzbekistan Airways’ning doimiy reysidan foydalangan.
Oliy martabali mehmon va Singapur delegatsiyasi a’zolari “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi, O‘zbekistonning istiqlol yillaridagi rivojlanishi va ushbu betakror majmuaning yaratilish tarixi bilan tanishdi, milliy madaniy markaz vakillari bilan uchrashdi. 24-may kuni Ko‘ksaroyda Singapur prezidentini rasmiy kutib olish marosimi bo‘lib o‘tdi. Shuningdek, u Singapur prezidenti Halima Yaqub boshchiligidagi delegatsiya O‘zbekiston prezidenti huzuridagi Davlat boshqaruvi akademiyasiga tashrif buyurdi.
Izoh (0)