Davlat tashrifi bilan O‘zbekistonda bo‘lib turgan Singapur prezidenti Halima Yaqub bugun bosh vazir o‘rinbosari Zulayho Mahkamova hamrohligida Samarqand shahriga tashrif buyurdi. Bu haqda Samarqand shahri hokimligi xabar berdi.
Qayd etilishicha, “Afrosiyob” poyezdida Samarqand shahriga kelgan oliy martabali mehmonni Samarqand viloyati hokimi Erkinjon Turdimov kutib oldi.
Shavkat Mirziyoyevning taklifiga binoan Singapur prezidenti Halima Yaqub 23-may kuni davlat tashrifi bilan O‘zbekistonga kelgandi. U mamlakatga kelishda Uzbekistan Airways’ning doimiy reysidan foydalangan.
Oliy martabali mehmon va Singapur delegatsiyasi a’zolari “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi, O‘zbekistonning istiqlol yillaridagi rivojlanishi va ushbu betakror majmuaning yaratilish tarixi bilan tanishdi, milliy madaniy markaz vakillari bilan uchrashdi. 24-may kuni Ko‘ksaroyda Singapur prezidentini rasmiy kutib olish marosimi bo‘lib o‘tdi. Shuningdek, u Singapur prezidenti Halima Yaqub boshchiligidagi delegatsiya O‘zbekiston prezidenti huzuridagi Davlat boshqaruvi akademiyasiga tashrif buyurdi.
Izoh (0)