“Нега ёвузлик тарафдасиз?” Зеленский Эрон халқига мурожаат қилди

Украина президенти Владимир Зеленский Эрон халқига мурожаат қилиб, Украинага қарши урушда Россияни қўллаб-қувватлаш орқали Эрон дунёдан янада кўпроқ яккаланаётганини таъкидлади.

Зеленскийнинг сўзларига кўра, Украинага қарши жами 1160 га яқин Shahed дронлари ишлатилган. Уларнинг аксарияти ҳаво ҳужумидан мудофаа кучлари ёрдамида уриб туширилган.

“Аммо бугунги кунда бундай зарбалар тинимсиз давом этаётганини ҳисобга олиб, мен тўғридан тўғри Эрон халқига мурожаат қилмоқчиман. Оддий савол: Россия террорига шерик бўлиш сизларга нега керак? Нега ёвуз давлат тарафидасиз? Бутун дунё нима бўлаётганини кўриб турибди, Эрондагиларнинг ҳаммаси кўряпти, ёвузликни қўллаб-қувватлаётганингизни инкор этиб бўлмайди”, — деди Зеленский.

Унинг таъкидлашича, украиналик ҳимоячилар Эроннинг Shahedъларини уриб туширишни ўрганган бўлса-да, ўтказиб юборилаётган зарбалар бор, бунинг оқибатида одамлар ҳалок бўлмоқда. “Россиянинг қўли билан, лекин сизнинг қуролингиз билан. Бу билан нимага эришасиз? Дунёдан янада кўпроқ изоляция, янада кўпроқ муаммоларга”, — деди Зеленский.

Украина раҳбарининг сўзларига кўра, Россия учун мутлақо ҳамма нарса нишон: уй-жой, мактаблар, касалхоналар, ибодатхоналар, черковлар, электр станциялари, бозорлар, ҳатто гуманитар ёрдам пунктлари ва автобус бекатлари. Бундай мисолларни минглаб келтириш мумкин.

Россия Украинадаги урушда Эрон қуролларидан, хусусан, Shahed-131/136 камикадзе-дронларидан фаол фойдаланмоқда. Аввалроқ The Guardian газетаси Эрон Россияга қайта фойдаланиш мумкин бўлган узоқ масофали ҳужумчи дронлар партиясини топширганини ёзганди. Ғарб ОАВлари Россия ва Эрон расмийлари Россия ҳудудида дронларни ишлаб чиқарувчи завод қуриш имконияти бўйича келишиб олгани ҳақида бир неча бор ёзган.