Россиянинг Белгород вилояти губернатори Вячеслав Гладков вилоят чегараси бўйлаб еттита ўзини-ўзи мудофаа батальонлари тузилганини, бироқ Россия қонунчилиги туфайли уларда қурол-яроғ йўқлигини айтди.
“Чегарада деярли уч минг киши бор. Улар ўтган йилнинг ноябрь ойидан бошлаб машғулотлар ўтамоқда. Булар аллақачон жанговар тайёр бўлинмалар бўлиб, уларга форма ва жиҳозлар етказиб берилган. Битта нарса — амалдаги қонунчилик билан боғлиқ ҳолда, қурол-яроғ масаласи ҳали ҳал қилинмаган”, — деди Гладков вилоят аҳолисидан бирининг саволига жавобан.
Губернатор, шунингдек, вилоят расмийлари ўзини-ўзи мудофаа жангчиларига қурол-яроғ етказиб бериш учун “ҳуқуқий асос қидираётгани”, аммо “қонун доирасида ҳаракат қилишга” мажбур эканини қўшимча қилди.
Белгород вилояти, Россиянинг Украина билан чегарадош бошқа ҳудудлари каби, мунтазам равишда ўққа тутилади. Минтақадаги кескин вазият туфайли 2022 йил ноябрда Гладков Украина билан чегарада “хавфсизлик чизиғи” – мудофаа истеҳкомлари тизими қурилаётганини маълум қилди. 2023 йил март ойида губернатор қурилиш тугалланганини эълон қилди. Шу билан бирга, Гладков линия учун 10 миллиард рубль сарфланганини айтди.
Барча тайёргарликларга қарамай, 22 май куни “Украина Қуролли кучларининг саботаж-разведка гуруҳи” Белгород вилоятининг Грайворон шаҳар округи ҳудудига бостириб кирди. Шу билан бирга, Глотово, Козинка ва Гора-Подил аҳоли пунктларида жанглар бўлиб ўтди. Кейинчалик, “Россия озодлиги легиони” ва Россия кўнгиллилар корпуси содир бўлган воқеа учун жавобгарликни ўз зиммасига олди — улар, асосан, руслардан иборат бўлинмалар бўлиб, Украина Қуролли кучлари томонида жанг қилади. Биргаликдаги баёнотларида тузилмалар вакиллари Россия ҳудудида бошқа “операциялар”ни режалаштираётганини айтишди.
Шу билан бирга, 7х7 Horizonтал Russia нашри 2022 йил сентябрь ойи бошидан бери чегарани қўриқлаш учун Белгород вилоятига тайёргарлик кўрмаган ҳарбий хизматчилар оммавий равишда юборилаётгани ҳақида хабар берди. Ҳарбий хизматчиларнинг оналари журналистларга фарзандлари чегарада “олдинги қаторда” эканини ва “ҳатто Украина аскарларини кўриб тургани”ни, уларнинг орқасида эса чегарачилар ва Росгвардия ходимлари патруллик қилишини айтган.
Изоҳ (0)