“Реал Мадрид” Ла Лига доирасида “Валенсия”га мағлуб бўлди (0:1). Ўйиндан кейин баҳс натижаси эмас, унда “Қироллик клуби” футболчиси Винисиус Жуниор билан бўлган вазиятлар кенг муҳокамага сабаб бўлди. Учрашув давомида ирқчилик руҳидаги ҳақоратларга дуч келган бразилиялик футболчи якунда қизил карточка билан “сийланди”. “Дарё” қуйида ушбу вазият ҳақида батафсил маълумот беради.
Мавсум охирига келиб портлаган Вини
Винисиус Жуниор мавсум давомида Ла Лиганинг деярли барча стадионларида ҳуштакбозлик ва ирқчилик руҳидаги ҳақоратларга дуч келди. “Месталья”даги ўйинда эса футболчининг асаблари дош бера олмади. Ҳаммаси ўйиндан олдин бошланди...
“Валенсия” мухлислари “Реал Мадрид” автобусини Винисиусга йўналтирилган ҳақоратлар билан кутиб олди. Ҳақоратлар ўйин вақтида ҳам давом этди. Валенсиялик мухлислар ҳужумчини “аҳмоқ маймун” деб атади ва унга ўлим тилади.
Иккинчи бўлим ўрталарида баҳсли ҳолатда пауза юзага келди: Винисиус қанотдан рақиб жарима майдонига ёриб кираётган вазиятда мезбонлар ҳимоячиси майдонга улоқтирилган бошқа тўпни чиқариб юбориш учун тепди, натижада тўп Винисиусда бўлиб турган тўпга тегди ва “Реал” футболчиси бу вазиятда мувозанатни тиклай олмай йиқилди. Ҳакамлар узоқ муҳокамадан кейин жарима зарбаси белгилади.
Шу вақтда дарвоза орти трибуналарида ирқчилик руҳидаги ҳайқириқлар янгради ва майдон томон турли буюмлар улоқтирилди. Винисиус ҳақорат ёғдираётган мухлислардан бирини кўрди ва бармоқлари билан уни кўрсатган ҳолда норозилигини кескин билдирди. Ҳакам эса стадион ходимларидан мухлисларни тинчлантиришни сўраб мурожаат қилишни талаб қилди. Шу тариқа ўйинда 8 дақиқага яқин тўхталиш бўлди.
Учрашувнинг асосий вақтига 10 дақиқа қўшиб берилди. Қўшиб берилган дақиқаларнинг чорак қисми ҳам ўтмасидан майдонда яна кескинлик рўй берди. Жарима зарбасидан йўлланган зарбани “Валенсия” дарвозабони Георгий Мамардашвили қайтарди ва бурчак зарбаси белгиланди.
“Валенсия” вакили Юнус Муса майдондаги тўпни Антонио Рюдигерга бермади, натижада меҳмонлар ҳимоячиси рақибини майдонга йиқитди ва шундан кейин оммавий жанжал бошланди. Винисиус Мусага кескин эътироз билдирди, вазиятга Мамардашвили ва “Валенисия”нинг бошқа футболчилари аралашди, натижада жанжал юзага келди.
“Валенсия” ҳужумчиси Уго Дуро Винисиусни томоғидан бўғди. Кейинроқ Винисиус Дуронинг юзига зарба берди. Ҳакам ВАР аралашувидан кейин Винисиусни майдондан четлатди, Дуро эса жазосиз қолди.
Ҳужумчи майдонни тарк этиш чоғида қўл ҳаракатлари билан “Валенсия” Сегундага тушиб кетиши кераклигига ишора қилди. Бу “кўршапалаклар” захира ўриндиғида ўтирганларга ёқмади ва майдон ташқарисидан ҳам тортишув юзага келди.
Ла Лига суриштирувни бошлади, “Валенсия” ҳам баёнот берди
Аввалига учрашув бош ҳаками Рикардо Бенгоэчеа ўйин баённомасида ирқчилик ҳақида ҳеч нарса келтирмагани айтилган хабарлар тарқалди. Кейинчалик бунга компьютердаги носозлик сабаб бўлгани эълон қилинди ва янги баённомага мухлислар томонидан Винисиусга нисбатан “Маймун, маймун!” дея ҳақоратли сўзлар айтилгани ёзилди.
Испания Ла Лигаси дарҳол ҳолат юзасидан суриштирув бошланганини маълум қилди. Суриштирув учун керак бўладиган барча маълумотлар тўпланаётгани айтилганди. Тегишли қўмита нафақат ўйин вақтида юз берган ҳолатлар, балки учрашувдан аввал содир бўлган вазият борасида ҳам суриштирув ўтказади.
Лига айбдорлар тегишли қоидалар бўйича жазога тортилишини маълум қилган.
“Валенсия” клуби ҳам ҳолат юзасидан баёнот берди ва Винисиус Жуниорга қилинган ирқчиликни қоралади. Клуб энг қаттиқ чоралар кўрилишини маълум қилди.
“Валенсия” футболдаги ҳар қандай ҳақорат ва камситишларни қоралайди. Клуб ҳурмат ва спорт қадриятларига содиқ бўлиб, стадионларда жисмоний ва оғзаки зўравонликка қарши ўз позициясини яна бир бор тасдиқлайди ҳамда Ла Лиганинг 35-тури доирасида “Реал Мадрид”га қарши ўйинда юз берган воқеалардан афсусда эканини билдиради. Клуб ҳодиса юзасидан текширув олиб бормоқда ва энг қаттиқ чораларни кўради.
“Бу футбол эмас. Бу Ла Лига”. Винисиус майдонда йиғлаб юборди ва ўйиндан кейин баёнот берди
Учрашув якунланганидан кейин Винисиус Жуниор ижтимоий тармоқларда катта пост қолдирди.
Ирқчилар қўлга киритган мукофот менинг четлатилишим бўлди. Бу футбол эмас. Бу Ла Лига.
Бу биринчи, иккинчи ёки учинчи марта эмас. Ирқчилик Ла Лигада одатий ҳолга айланган. Лига буни нормал деб ҳисоблайди, федерация ҳам, рақиблар ҳар ўйинда бундан фойдаланади. Жуда афсусдаман. Қачонлардир Роналдиньо, Роналдо, Криштиану ва Мессига тегишли бўлган чемпионат ҳозирда ирқчиларники.
Мени кутиб олган ва мен севган халқ дунёга ўзини ирқчи давлат сифатида кўрсатишга рози бўлмоқда. Афсуски, ҳар ҳафта содир бўладиган бундай ҳолатдан ҳимоялана олмайман. Буни қабул қиламан. Кучлиман ва ирқчиларга қарши охиригача бораман. Узоққа боришга тўғри келса ҳам.
Карло Анчелотти ҳам футболчининг ёнини олди.
Футболни муҳокама қилишни хоҳлайсизми? Мен йўқ!
Винисиусдан ўйинни давом эттиришни хоҳлайсанми, деб сўрадим. Ўйиндаги ёмон атмосфера сабабли футболчини майдондан олиш нотўғри. Футболчини ёмон ўйнагани учун захирага олишим керак, ирқчилик учун эмас. Лекин бугун содир бўлган ҳолатга аввал ҳам дуч келганмиз, бироқ бундай кўринишда эмас. Буни қабул қилиб бўлмайди.
Мен нима қилиш кераклигини айтадиган одам эмасман, лекин бу тарзда футбол ўйнаб бўлмайди. Ҳозир 2023 йилда ирқчиликка йўл қўйилиши мумкин эмас. Ягона чиқиш йўли — ўйинни тўхтатиш.
Ҳакам маълум бир протокол борлигини айтди, бироқ бутун стадион футболчини “маймун” деб атаётганди. Яна нима дейишим керак? Жуда ҳам хафаман, бундай ҳолат мен билан ҳеч қачон содир бўлмаганди. Ҳеч қачон футболчини майдондан ҳақоратлар сабабли оламан деб ўйламагандим. Винисиус шунчаки футбол ўйнашни хоҳлаётган йигит. Бу қийин вазият.
Қолаверса, чоршанба куни мухлисларимиз Винисиуснинг ўйинини қизил карточка туфайли кўра олмайди. Ҳаммамиз Винини қўллаб-қувватлаймиз. У хафа, чунки шунчаки футбол ўйнашни хоҳлайди.
Футболчилар Винисиусни оммавий равишда қўллаб-қувватлади. Лекин ҳамма ҳам эмас.
Мадрид клуби асосий юлдузларидан бири доимий равишда ҳақорат қилинишидан чарчаган. Marca нашрининг ёзишича, “Реал” “Месталья”да содир бўлган воқеадан кейин Винисиусни ҳимоя қилиш учун охиригача бормоқчи.
Жамоадошлари ҳам бразилиялик футболчини қўллаб-қувватлади. “Гол уришни хоҳлаётганимнинг ягона сабаби сени қучоқлаш ва уни сенга бағишлаш”, — деди Федерико Вальверде.
“Агар Винисиус майдонни тарк этишга қарор қилса, мен у билан бирга чиқиб кетардим. Етар. Ўйиннинг 20-дақиқасиданоқ уни ҳақорат қилишни бошлашди”, — деди дарвозабон Тибо Куртуа.
“Испанияда яна бир қайғули кун. Ирқчилар ғалаба қозонган кун. Бу шармандалик. Ирқчиликдан азоб чекиш ва кейин ўзингни ҳимоя қилганинг учун қизил карточка олиш! Қачонгача бунга чидашимиз керак? Мен сен биланман, биродар, курашимиз давом этмоқда”, — деди Винисиуснинг ватандоши ва жамоадоши Эдер Милитао.
“Валенсия” футболчиси Жастин Клюверт ҳам бразилиялик футболчининг тарафини олди. “Менга Винисиус билан бўлган ҳолат ёқмаяпти. Бу футбол эмас”.
Дани Себальос ҳам жамоадошини қўллаб-қувватлади, бироқ унинг Сегунда ҳақидаги ҳаракатларини маъқулламади.
“Бундай давом этиши мумкин эмас. Уни Испаниянинг барча стадионларида ҳақорат қилишади.
Винисиуснинг ишорасини ҳам оқлаб бўлмайди. “Валенсия” мухлислари кўпроқ ҳурматга лойиқ. Умид қиламанки, улар Винини кечиради”.
Изоҳ (0)