Шавкат Мирзиёевнинг таклифига биноан Сингапур президенти Ҳалима Яқуб 23 май куни давлат ташрифи билан Ўзбекистонга келди.
Президент ва унинг турмуш ўртоғи 21-23 май кунлари Қозоғистонга давлат ташрифини амалга оширди ва 23 май куни Uzbekistan Airways’нинг доимий рейси (HY722) орқали Остонадан Тошкентга етиб келган.
Тошкент аэропортида олий мартабали меҳмон шарафига икки давлат байроқлари кўтарилди ва фахрий қоровул саф тортди. Сингапур президенти ва унинг турмуш ўртоғини бош вазир ўринбосари Зулайҳо Маҳкамова, ташқи ишлар вазири Бахтиёр Саидов ва Тошкент шаҳри ҳокими вазифасини бажарувчи Шавкат Умурзоқов кутиб олди. Сингапур президенти Тошкент шаҳридаги ресторанда овқатланди.
Олий мартабали меҳмон ва Сингапур делегацияси аъзолари “Янги Ўзбекистон” боғига ташриф буюриб, Мустақиллик монументи пойига гул қўйди, мамлакатимизнинг истиқлол йилларидаги ривожланиши ва ушбу бетакрор мажмуанинг яратилиши тарихи билан танишди, миллий маданий марказлар вакиллари билан учрашди. Ташрифнинг асосий тадбирлари эртага бўлиб ўтади.
Изоҳ (0)