Ўзбекистоннинг уч ҳудудида электрдан ноқонуний фойдаланганлар 700 млн сўмдан зиёд зарар етказди

Ўзбекистоннинг уч ҳудудида электрдан ноқонуний фойдаланганлар 700 миллион сўмдан зиёд зарар етказгани аниқланди. Бу ҳақда Иқтисодий жиноятларга қарши курашиш департаменти ахборот хизмати хабар берди. 

Хабарга кўра, Бош прокуратура ҳузуридаги департаментнинг Қува туман бўлими томонидан ўтказилган терговга қадар текширувда “Ф.С.” МЧЖ раҳбари И.А. ва бошқалар тош майдалаш цехидаги электр ҳисоблагичга ташқаридан таъсир ўтказгани аниқланди. Улар жами 279,3 миллион сўмлик электр энергиясидан ноқонуний фойдаланган.

Шу каби, Булунғур туманидаги “Д.И.” фермер хўжалиги ва Паяриқ туманидаги “Ф.Ф.” оилавий корхонаси раҳбарлари хўжалик сув насосини ҳамда тўйхона биносини умумуй фойдаланишдаги электр трамоғига ўзбошимчалик улаб, жами 225 миллион сўмлик электр энергиясидан ноқонуний фойдалангани аниқланган.

Департаментнинг Тошкент вилояти бошқармаси томонидан ўтказилган терговга қадар текширувда, Бекобод туманидаги “М.Г.” МЧЖ раҳбари Г.А. ва бошқалар ишлаб чиқариш цехидаги электр ҳисоблагич тамғасини бузиб, жами 192,2 миллион сўмлик электр энергиясидан ноқонуний фойдалангани аниқланган.

Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.