UzAuto Motors компанияси автомобилларни етказиб бериш жараёнларини тезлаштириш мақсадида Chevrolet Damas ва Labо автомобилларини ишлаб чиқариш ҳажмини кўпайтириш дастурини якунлади.
Маълум қилинишича, эндиликда амалга оширилган чора-тадбирлар ушбу талабгир моделларнинг ишлаб чиқариш ҳажмини йилига 150 минг донага босқичма-босқич ошириш имконини беради, бу эса ўз навбатида етказиб бериш муддатига ҳам ўз таъсирини ўтказади.
Заводнинг ишлаб чиқариш қувватини босқичма-босқич ошириш 2016 йилдан буён ишлаб чиқариш ҳажмини деярли 5 баробар кўпайтиришга имкон берди. UzAuto Motors'нинг Хоразм филиалида ишлаб чиқаришни оптималлаштириш ва модернизация қилиш бўйича олиб борилган тизимли ишлар 2022 йилга келиб ишлаб чиқариш ҳажмини 93 000 дан ортиқ автомобилга оширди (2021 йилга нисбатан қарийб 30 фоизга кўп).
UzAuto Motors 2021 йилда ишлаб чиқариш ҳажмини ошириш дастури доирасида Питнак шаҳрида янги пресс-сехни ишга туширди. 1 гектардан ортиқ ҳудудда йўлга қўйилган ишлаб чиқариш, максимал қувватга эришгандан сўнг ҳар йили 12 минг тонна металл листдан Chevrolet Damas ва Labо моделлари учун 7 миллион донагача турли штамплаш кузов қисмларини ишлаб чиқариш имконини беради.
Бутловчи қисмларни маҳаллийлаштириш, айрим компонентларни деконтентинг қилиш (арзонроқ вариантига алмаштириш) ва ишлаб чиқариш жараёнларини унификасия қилиш бўйича амалга оширилган чора-тадбирлар импортни қисқартирган ҳолда ишлаб чиқариш ҳажмини оширишга имкон беради.
Изоҳ (0)