Туркиядаги президентлик сайловининг биринчи турида мағлуб бўлган собиқ номзод, Ата альянсидан Синан Оған иккинчи турда президент Ражаб Тоййиб Эрдўғонни қўллаб-қувватламоқчи. Бу ҳақда Anadolu Gazete хабар берди.
“Ҳуррият” газетаси мухбири, ҳукуматдаги одамларга яқин бўлган Абдулқодир Селвининг ОАВга маълум қилишича, Синан Оған 28 май куни бўлиб ўтадиган президентлик сайловларининг иккинчи босқичида амалдаги президентни қўллаб-қувватлайди ва республикадаги ислоҳотлар бўйича Эрдўғон билан муҳокама қилинган бандларни эълон қилади.
Оған беш банддан иборат протокол имзолаши ва Эрдўғонни қўллаб-қувватлашини билдириши кутилмоқда.
“Ушбу бандлар қуйидагиларни назарда тутади: Конституциянинг дастлабки тўртта бандини ўзгартирмаслик. Конституциядан этник туркийликка оид бандларни чиқариб ташлашга уринишларнинг олдини олиш, барча турдаги террорчилик ташкилотлари ва терроризмга қарши кураш, қочоқларни режага мувофиқ босқичма-босқич депортация қилиш, иқтисодий сиёсатни халқаро бозорларга мос равишда ишлаб чиқиш ва фоиз ставкаси сиёсатида кўпроқ мослашувчанлик”, — дейилади нашр хабарида.
Anadolu ёзишича, Синан Оған амалдаги президент билан учрашишдан олдин ташқи ишлар вазири Мевлуд Чавушўғли билан музокара ўтказган. Унга қадар Оған Twitter саҳифасида шундай баёнот берган:
“Шуни аён қилишни истардикки, қароримиз қандайдир мотивларга эмас, балки турк миллатининг келажаги, мамлакатимизнинг бирлиги, яхлитлиги ва барқарорлиги асосий ўринда туришига асосланган, биз қандайдир умидлар эмас, тамойиллар асосида танлов қилганмиз”.
Оған бугун, 22 май куни маҳаллий вақт билан соат 17:00 да (Тошкент вақти билан 19:00) матбуот анжумани ўтказиб, сайловнинг иккинчи босқичи ҳақидаги позициясини эълон қилиши кутилмоқда.
Туркия президентлиги учун сайловларнинг иккинчи босқичи хориждаги туркияликлар учун бошланган.
Сайловлар ҳақида
14 май куни Туркияда президентлик ва парламент сайловлари бўлиб ўтди. Биринчи тур натижаларига кўра, Эрдўғон 49,24 фоиз, Қиличдарўғли 45,07 фоиз овоз олган. Биринчи турда ғалаба қозониш учун номзодга 50 фоиздан кўпроқ овоз керак эди, шунинг учун овоз беришнинг иккинчи босқичи 28 май куни бўлиб ўтади.
Туркия Марказий сайлов комиссияси маълумотларига кўра, 14 май куни бўлиб ўтган сайловда иштирок этганлар 88,92 фоизни ташкил қилган. Кузатувчилар овоз беришнинг иккинчи босқичида ҳам сайловчиларнинг фаоллигини кутишмоқда.
Изоҳ (0)