Энг йирик компаниялардан бири бўлган Абу-Даби Миллий энергетика компанияси (ТАQА) Ўзбекистон ҳукумати билан Ўзбекистоннинг энергетика соҳасига сармоя киритиш учун стратегик имкониятларни ўрганиш бўйича ҳамкорлик бошланганини эълон қилди. Хусусан, янги ва мавжуд электр станциялари ҳамда тегишли энергетика инфратузилмаси кабилар ўрганиб чиқилади, сармоя қиймати эса 3 миллиард доллардан ортиқ бўлиши мумкин. Бу ҳақда Emirates 24 хабар бермоқда.
Стратегик битим ва уни амалга ошириш тўғрисидаги шартномани Ўзбекистон Энергетика вазирининг биринчи ўринбосари Азим Аҳмадхўжаев ҳамда Инвестициялар, саноат ва савдо вазири ўринбосари Сарвар Ҳамидов, ТАQА номидан эса компания бош ижрочи директори ва бошқарувчи директори Ясим Ҳусайн Забет имзолади.
Амалга ошириш тўғрисидаги шартнома тахминан 1,5 ГВт қувватга эга бўлган яшил майдонли комбинацияланган электр станцияси бўйича таклифларни ўз ичига олади. Янги лойиҳа Толимаржон энергетика мажмуаси ёнида йўлга қўйилади, у ерда аввалроқ ТАQА иккита газ электр станциясини хусусийлаштиришга сармоя киритиш режаларини эълон қилганди. Янги ҳамкорлик ТАQА томонидан электр станциясини лойиҳалаш, молиялаштириш, таъминот, ишга тушириш, синовдан ўтказиш, эгалик қилиш ва фойдаланиш кабиларни қамраб олиши кутилмоқда.
Шартномаларда, шунингдек, Ўзбекистондаги электр узатиш ва тақсимлаш инфратузилмаси билан биргаликда умумий қуввати 3 ГВт дан ортиқ бўлган мавжуд ва келгусида яратиладиган яшил майдонда газ билан ишлайдиган электр ишлаб чиқариш станцияларига сармоя киритиш имкониятлари кўриб чиқилмоқда.
Нашр таъкидлашича, ушбу келишувлар ТАQА’га янги ва мавжуд энергия ишлаб чиқариш лойиҳаларини қўллаб-қувватлаш учун Ўзбекистонга эксплуатация ва техник хизмат кўрсатиш тажрибасини олиб киришга йўл очади. Компания, шунингдек, Ўзбекистон ҳукуматининг соҳани ислоҳ қилиш жараёнини қўллаб-қувватламоқда. Энергия узатиш ва тарқатишда компания Ўзбекистон ҳукуматига узатиш ва тарқатиш тармоғининг ишлаши, тармоқ активларини модернизация қилиш ва йиғиш хизматларини сезиларли даражада яхшилашга ёрдам бериш учун халқаро инфратузилмани ривожлантириш ва эксплуатация қилиш бўйича илғор тажрибасини улашади.
Инвестициялар, саноат ва савдо вазири ўринбосари Сарвар Ҳамидов Ўзбекистон ТАQА билан ушбу муҳим энергия ва инфратузилма лойиҳаларида яна бир бор ҳамкорлик қилишдан мамнун эканини айтган:
“Ушбу ҳамкорлик ва лойиҳалар линияси барқарор ва ишончли энергетика секторига сармоя киритиш ва қўллаб-қувватлаш бўйича мамлакатларимиз ўртасидаги мавжуд имкониятлар ва умумий манфаатларимизга асосланади. Биз Ўзбекистондаги ўзгаришларни илгари суриш учун ТАQА билан ҳамкорликни интиқлик билан кутяпмиз”.
ТАQА гуруҳининг бош ижрочи ва бошқарувчи директори Ясим Ҳусайн Забет шундай деган:
“ТАQА Ўзбекистон ҳукумати билан ҳамкорлигимиз доирасида ўзининг кенг глобал тажрибасидан фойдаланиш имкониятидан мамнун. Биргаликда ишлаш орқали биз мамлакат энергетика тармоғининг барқарор ривожланишини жадаллаштиришимиз ва мамлакатларимиз ўртасидаги муносабатларни мустаҳкамлашимиз мумкин. Ўзбекистоннинг тармоқ ва ишлаб чиқариш сектори имкониятларини модернизация қилишга ёрдам беришдан ташқари, мамлакатнинг етакчи вазирлик идоралари билан яқиндан ҳамкорлик қилиш бизга халқаро портфелимизни бойитиш, жаҳон коммунал хизматлари етакчиси сифатидаги мавқейимизни мустаҳкамлаш имконини беради”.
Битимларни имзолаш маросимида ТАQА, ADNOC ва Mubadala компаниялари иттифоқига қарашли Аbu Dhabi Future Energy Company қўшма корхонаси Ўзбекистон Энергетика вазирлиги ҳамда Инвестициялар, саноат ва савдо вазирлиги билан қўшма ривожланиш шартномасини имзолаган. Унда Ўзбекистон бўйлаб бир нечта объектларда 2 гигаваттдан юқори бўлган қуёш ва шамол лойиҳаларини ҳамда 500 мегаватт/соат батарея қувватини сақлашни ривожлантириш назарда тутилган.
Изоҳ (0)