The New York Times нашри Туркия президенти Ражаб Тоййиб Эрдўғон сайловда ҳокимиятни йўқотса, Россия ва Европа Иттифоқи бунга қандай муносабат билдиришини прогноз қилди.
Прогнозга кўра, Россия ҳукумати иқтисодий ва дипломатик ҳамкорликни йўқотиши мумкин бўлса, Европа Иттифоқи “вазминроқ Туркия”га эга бўлишдан хурсанд бўларди. NYT Туркиядаги бугунги президентлик сайловлари Ғарбда, НАТО бош қароргоҳи ва Кремлда кузатилаётганини, томонлар ўртасидаги мураккаб ва кўпинча ёқимсиз муносабатларда Анқаранинг воситачилик роли сайлов натижаларига боғлиқлигини маълум қилди.
Туркиядаги сайловларга эътиборнинг ортишига плебиссит (жуда муҳим масалани ҳал қилишни умумхалқ овозига қўйиш) арафасида ўтказилган сўровлар Эрдўғон рақиби Камол Қиличдорўғлидан бир оз ортда қолганини кўрсатгани билан боғлиқ.
NYT таъкидлашича, Ғарбдаги расмийлар анъанавий тарзда Туркиянинг ички ишларига аралашганликда айбланмаслик учун муносабат билдирмайди.
“Ҳеч кимга сир эмаски, Европа етакчилари, Жо Байден маъмурияти ҳақида гапирмаса ҳам, Эрдўғон мағлуб бўлса, хурсанд бўлади”, — дейилади хабарда.
Нашр Швециянинг собиқ бош вазири Карл Билдтнинг “Биз ҳаммамиз Туркия учун енгиллик истаймиз” деган сўзларини келтиради.
Таъкидланишича, бу НАТОнинг стратегик муҳим аъзоси – Эрдўғон бошчилигидаги Туркия Европа Иттифоқи учун тобора нохуш ҳамкорга айланиб бораётгани билан боғлиқ. Россия ҳам кўп жиҳатдан сайлов натижаларига боғлиқлиги, чунки Эрдўғон даврида Туркия Россиянинг жиддий савдо шериги ва дипломатик воситачига айлангани таъкидланган.
“Бу муносабатлар Украинага қилинган ҳужум фонида Кремль учун янада аҳамиятли бўлди”, — дейилади хабарда.
Эрдўғон Ғарбнинг ҳафсаласини қандай пир қилди?
NYT мақоласида қайд этилишича, Эрдўғон ҳокимиятдаги 20 йиллик фаолияти давомида кўпинча Ғарбдаги иттифоқчиларини хафа қилган ва Кремль учун қулай дипломатик имкониятлар яратган ташқи сиёсат юритган.
Биринчидан, Эрдўғон Ғарбнинг Россияга қарши санкцияларини қўллаб-қувватлашдан бош тортган, бу эса Кремлни уруш учун пулдан маҳрум қилишга путур етказган, бунинг эвазига у катта чегирмаларда рус нефтини олган.
Иккинчидан, Туркия президенти Швесиянинг НАТОга киришини тўсиб қўйганида иттифоқчиларнинг ҳафсаласи пир бўлди. Кенгроқ маънода, Европа Иттифоқи ва АҚШ ўртасида Туркия Эрдўғон бошчилигидаги қонун устуворлиги ва матбуот эркинлиги каби Европа қадриятлари ва меъёрларидан янада узоқлашгани ҳақида фикр бор.
Нашрга кўра, АҚШ, Европа Иттифоқи ва НАТО мухолифатнинг ғалабасидан наф кўрар экан, Эрдўғон тахтдан ағдарилса, Россия президенти Владимир Путин, албатта, ютқизувчи саналади.
Қиличдарўғлига келсак, нашрнинг таъкидлашича, агар у президентлик сайловларида ғалаба қозонса, Россия билан иқтисодий алоқаларни давом эттиришга ваъда берган, бироқ у Эрдўғоннинг Украина масаласидаги нозик мувозанат ҳаракатини сақлаб қолиши ҳали аниқ эмаслигини таъкидлаган.
Туркияда президентлик сайловлари бошланди
14 май куни Туркияда президентлик сайловлари бошланди. Президентлик учун учта номзод курашмоқда: президент Ражаб Тоййиб Эрдўғон, Олти мухолифатчи партияси альянсидан (Халқ альянси) номзод Камол Қиличдарўғли ва Отатуркчилар иттифоқи”дан номзод Синан Оган.
Дастлабки натижалар бугун кечқурун эълон қилиниши кутилмоқда
Изоҳ (0)