SpaceX компаниясининг Falcon 9 ракета-ташувчиси Crew Dragon бошқариладиган космик кемаси билан Axiom тижорат дастури доирасида Халқаро космик станцияга (ХКС) учирилди. Бу ҳақда компания сайтида хабар берилди.
Кемага NASA собиқ астронавти ва ХКСнинг биринчи аёл командири Пегги Уитсон қўмондонлик қилмоқда, учувчи – тадбиркор Жон Шофнер, экипаж аъзолари эса саудиялик астронавтлар Райян Барнави ва Али ал-Карнидир. Улар ХКСда саккиз кун қолиб, станциянинг доимий экипажи билан бирга ишлайди.
Космик кема Флорида штати, Канаверал бурнидаги Кеннеди космик марказидан учирилган. ХКС билан туташув 22 май куни Тошкент вақти билан 18:24 га режалаштирилган.
Бу Американинг Axiom компанияси дастури бўйича ХКСга иккинчи тижорий парвоз бўлди.
Axiom-1 нинг биринчи тижорий миссияси 2022 йил апрель ойида бўлиб ўтганди. Учинчи (Ах-3) миссия 2023 йил охирига режалаштирилган бўлиб, унда тўрт кишидан иборат экипаж ХКСда икки ҳафта вақт ўтказади.
Axiom-1 миссиясининг ҳар бир иштирокчиси учун парвоз нархи 55 миллион долларга баҳоланмоқда.
SpaceX билан келишувга асосан Axiom Space дастури доирасида космик сайёҳлар билан парвозлар келгусида йилига икки-уч марта амалга оширилиши режалаштирилган.
Учиришдан тахминан саккиз дақиқа ўтгач, ракетанинг қайта фойдаланиш мумкин бўлган биринчи бўлаги Канаверал бурнидаги авиабаза майдончасига қайтиб қўнган.
Изоҳ (0)