Туркияда 14 май куни бўлиб ўтган президентлик сайловларида ҳеч қайси номзод биринчи турда ғалаба қозониш учун зарур бўлган 50 фоиз овозни тўплай олмади. Сайлов бюллетенлари 100 фоиз ҳисоблаб чиқилгач, амалдаги давлат раҳбари Ражаб Тоййиб Эрдўғон 49,24 фоиз, унинг асосий рақиби, Олти мухолифатчи партияси альянсидан (Халқ альянси) номзод Камол Қиличдарўғли эса 45 фоиз овоз олгани маълум бўлди. Якуний ғолиб 28 май куни бўлиб ўтадиган иккинчи босқичда аниқланади.
Туркияда президентлик ва парламент сайловлари тарихий ҳодиса деб аталмоқда, чунки Эрдўғон президент бўлган 20 йил вақт ичида биринчи марта мухолифатчи номзодда муваффақият қозониш имконияти пайдо бўлди.
Президентликка яна бир номзод Синан Оган 5,21 фоиз овозни қўлга киритди. Аввалроқ сайловнинг тўртинчи номзоди бўлган Ватан партияси етакчиси Муҳаррем Инже сайловда қатнашмаслигини билдирганди. Инже мазкур хатти-ҳаракатига сайловолди ташвиқоти пайтида унга зарба берган компроматлар тўлқини сабаб бўлганини айтган. Сиёсатчи 45 кун давомида унинг сохта, компромат суратлари турк оммавий ахборот воситаларида тарқалиб кетгани ва ҳуқуқ-тартибот идоралари бу фактларни текширишдан четлашганини таъкидлаган.
Таҳлилчиларнинг фикрича, биринчи турдаги натижа турк жамиятидаги қутбланишнинг юқори даражасини тасдиқлайди.
Иккала асосий номзод ҳам якуний ғалабага ишонч билдирган.
Изоҳ (0)