Toshkent shahar Chilonzor tumanidagi jarima maydonlaridan birida yo‘l-patrul xizmati xodimlari va fuqarolar o‘rtasida janjal yuz berdi. Bu haqda Ichki ishlar vazirligi xabar qildi.
Qayd etilishicha, o‘sha kuni yo‘l-patrul xizmati xodimlari Nexia mashinasi glushiteliga qo‘shimcha uskuna — ovoz kuchaytirgich o‘rnatilganini aniqlagan. Bu mashina egasining shu kuni ma’lum bo‘lgan birinchi qoidabuzarligi bo‘lgan.
Keyinroq Nexia haydovchisining avtomobil yon, oldi oynalarini ruxsatnomasiz qoraytirib olgani ma’lum bo‘lgan.
Bundan tashqari, haydovchining yetib kelgan do‘sti jarima maydoniga vaqtincha joylashtirilgan mashinaning qoraytirilgan plyonkalarini o‘zboshimchalik bilan shilib tashlagan.
Bir qancha qoidabuzarlik sodir etgan Nexia haydovchisiga YPX xodimlari ma’muriy bayonnoma rasmiylashtirmoqchi bo‘lgan. Ammo haydovchining yetib kelgan 3 nafar do‘stlari bunga to‘sqinlik qilib, janjal boshlagan. Tortishuvga atrofdagi boshqa fuqarolarni ham jalb qilgan. So‘ng voqeani videoga olib, ijtimoiy tarmoqqa joylagan.
Holat yuzasidan tarqalgan videoda bir necha shaxs Ichki ishlar organlari xodimlarining qonuniy faoliyatiga aralashib, inspektorlarning ogohlantirishlariga qaramay jamoat tartibini buzgan. Shuningdek, kurakda turmaydigan gaplar aytib, organ xodimlarini obro‘sizlantirishga uringan.
Bo‘lib o‘tgan holat yuzasidan hujjatlar rasmiylashtirib, jinoyat ishlari bo‘yicha Chilonzor tuman sudiga taqdim etilgan. Sud majlisidan so‘ng YPX xodimlarining faoliyatiga qarshilik qilgan, jamoat tartibini buzib, bezorilik sodir etgan shaxslarga nisbatan qaror qabul qilingan.
Unga ko‘ra, fuqarolarga Ma’muriy javobgarlik to‘g‘risidagi kodeksning 183 (mayda bezorilik), 194-moddasi (ichki ishlar organlari xodimining qonuniy talablarini bajarmaslik) 1-qismida bayon etilgan huquqbuzarlikni sodir etganlikda aybdor deb topilib, shu kodeksning 34-moddasi tartibida uzil-kesil 10 sutka ma’muriy qamoq jazosi tayinlangan.
Izoh (0)