Қозоғистон президенти Қосим-Жўмарт Тўқаев 17 май куни 70 ёшни қаршилайди. Сиёсатчининг матбуот котиби Руслан Желдибай президент туғилган кунини қандай ўтказиши ҳақида маълумот берди.
Желдибайнинг таъкидлашича, президент матбуот хизматига унинг яқинлашиб келаётган юбилейи ҳақида саволлар келиб тушмоқда.
“Туғилган кун муносабати билан ҳеч қандай тадбир режалаштирилмаган. Бу президентнинг принципиал позицияси. Давлат раҳбари 17 майни одатдагидек ўтказади”, — деди у.
Шу куни Қосим-Жўмарт Тўқаевнинг Хитойга давлат ташрифи бошланади. Қозоғистонда ҳам, Хитойга ташриф доирасида ҳам туғилган кун тадбирлари ўтказилмайди.
Қайд этиш жоизки, ўтган йиллар давомида ҳам Қосим-Жўмарт Тўқаев туғилган кунини нишонламаган. Унинг собиқ матбуот котиби Берик Уали аввалроқ тушунтирганидек, президент бу кунни нишонлашни ёқтирмайди, чунки унинг оиласида болаларнинг ҳам, ота-оналарнинг ҳам туғилган кунини нишонлаш одат тусига кирмаган.
Эслатиб ўтамиз, Қосим-Жўмарт Тўқаев 1953 йилда Олмаота шаҳрида таниқли ёзувчи Кемел Тўқаев ва ўқитувчи Турар Шабарбаева оиласида туғилган. 1970 йилда 25-сонли ўрта мактабни тугатгач, Тўқаев Москва давлат халқаро алоқалар институтига ўқишга кирди. 1992 йилда Россия Ташқи ишлар вазирлиги Дипломатик академиясини тамомлади.
Қосим-Жўмарт Тўқаев меҳнат фаолиятини 1975 йилда СССР Ташқи ишлар вазирлигида навбатчи референт сифатида бошлаган. Турли йилларда СССР Ташқи ишлар вазирлиги котиби, вазир ўринбосари, кейинроқ Қозоғистон ташқи ишлар вазири, бош вазир ўринбосари, бош вазир, сенат раиси лавозимларида ишлаган.
2011—2013 йилларда БМТ бош котиби ўринбосари, БМТнинг Женевадаги бўлими бош директори, Қуролсизланиш бўйича конференцияда БМТ Бош котибининг шахсий вакили бўлган. 2019 йилнинг март ойидан Қозоғистон республикаси президенти лавозимида ишлаб келмоқда.
Изоҳ (0)