Польша Жанубий Кореядан FA-50 ва АҚШдан F-35 самолётларини олаётгани муносабати билан ўзининг MiG-29 қирувчи самолётларини Украинага топширади. Бу ҳақда Польша президенти Анжей Дуда австриялик ҳамкасби Александр ван дер Беллен билан Венада бўлиб ўтган брифингда маълум қилди.
“Ўзимиздаги MiG-29 самолётларининг барчасини босқичма-босқич жўнатишимиз эҳтимоли катта”, — деди Дуда.
Жанубий Кореянинг FA-50 самолётлари биринчи партиясини Польшага етказиб бериш 2023 йилга мўлжалланган.
Дуданинг қайд этишича, Польша Украинага ҳарбий ёрдам кўрсатиш бўйича АҚШ ва Буюк Британиядан кейин учинчи ўринда турибди. Унинг сўзларига кўра, Варшава Киевга 300 дан ортиқ PT-91 ва T-72 танклари, шунингдек, Леопард 2 танкларини, Краб ўзиюрар артиллерия мосламаларини, Пиорун зенит-ракета тизимларини топширган.
Апрель бошида Дуда Польша аллақачон саккизта MiG-29 қирувчисини Киевга етказиб берганини ва шу турдаги олтита қирувчини топширишга тайёрланаётганини айтганди.
Украина АҚШдан ҳам қирувчилар сўрамоқда
12 апрель куни Украина бош вазири Денис Шмигал АҚШ Мудофаа вазири Ллойд Остин билан учрашувда узоқ масофали ракеталар, F-15 ва F-16 қирувчи-бомбардимончи самолётлари, шунингдек, қўшимча зирҳли машиналар ва бошқа қуролларни Киевга беришни сўраганди.
АҚШ сенаторлари бир неча бор сиёсий ва ҳарбий раҳбариятни Украинага замонавий қирувчи самолётларни топширишга чақирган.
Оқ уй эса АҚШ бошқа давлатларнинг Украинага қирувчилар беришини олқишлаши, бироқ Америка ҳукуматининг ўзи бундай ёрдамни ваъда бермаслиги ҳақида маълум қилган.
АҚШ президенти Жо Байден ABC каналига берган интервьюсида “Украинага ҳозир F-16 қирувчилари керак эмас” деган. Кейинроқ АҚШ президентининг миллий хавфсизлик бўйича маслаҳатчиси Жейк Салливан Байденнинг сўзларини тушунтириб, Оқ уй урушда Украинанинг шошилинч эҳтиёжларини биринчи ўринга қўйиб келаётганини таъкидлади.
Изоҳ (0)