Марказий Осиёнинг айрим давлатлари таваккал қилишга тайёр эмаслиги ва Ғарбнинг Россияга қарши санкцияларига қўшилиши мумкинлигини намойиш қилмоқда. Бу ҳақда Россия ташқи ишлар вазири ўринбосари Михаил Галузин “Валдай” халқаро мунозара клубининг III Марказий Осиё конференциясида маълум қилди.
“Бир томонлама иқтисодий чекловларнинг номақбуллиги ва ноқонунийлиги ҳақидаги позициялар ўхшаш эканига қарамай, Марказий Осиёнинг бир қатор давлатлари тегишли таваккалчиликларни ўз зиммасига олишни истамаяпти, улар Ғарбнинг чекловчи чораларига амал қилишга тайёр эканини яққол кўрсатмоқда”, — деди вазир ўринбосари.
Галузиннинг сўзларига кўра, Россия “ўзаро мажбуриятларга, шу жумладан Коллектив хавфсизлик шартномаси, Евросиё иқтисодий иттифоқи ва Мустақил Давлатлар Ҳамдўстлиги тузилмаларидаги мажбуриятларга зид бўлмаган ҳолатларнинг ҳеч бирида” кимгадир қандай ташқи ва ички сиёсий йўл тутиш кераклигини уқтирмайди. “Ишончимиз комилки, Марказий Осиё пойтахтлари буни кўриб турибди ва тушунмоқда: Россия билан алоқаларни сунъий тарзда йўқ қилиш донг таратган иккиламчи санкциялардан кўра жиддийроқ зарар келтириши мумкин”, — дея қўшимча қилди у.
Вазир ўринбосари Россия Марказий Осиё давлатлари билан стратегик шериклик муносабатларини изчил мустаҳкамлашга қатъий қарор қилганини таъкидлади.
Изоҳ (0)