Ўзбекистонга халқаро инвестицияларнинг киритилиши сўнгги олти йилда ўн баравар ошди. 2017 йилда бошланган ҳукуматнинг кенг кўламли ислоҳотлари иқтисодиётни очиб, Марказий Осиё давлатига хорижий капитални жалб қилмоқда ва инвесторлар сонини оширмоқда. Бу ҳақда Euronews нашри Ўзбекистондаги ислоҳотларга бағишланган мақоласида ёзади.
Нашр қайд этганидек, Жиззах вилоятида Silverleafe Америка—Ўзбекистон қўшма корхонаси пахта етиштирмоқда. Уруғ экишдан тортиб ҳосилни йиғиб олишгача бўлган бутун жараён 100 фоиз автоматлаштирилган.
Бу йил Silverleafe Ўзбекистонда янги технологияни жорий қилмоқда, у машинада терилган пахтани рақамли шаклда кузатишни таъминлайди, барча жиҳозлар АҚШдан келтирилган.
Корхона директори Ўзбекистонга 2018 йилда президент Шавкат Мирзиёев томонидан қишлоқ хўжалигини модернизация қилиш ва бу ислоҳотларда иштирок этиш учун таклиф этилган эди. Silverleafe Ўзбекистонга жами 40 миллион АҚШ доллари (36,23 миллион евро) атрофида сармоя киритган.
“Одамлар ислоҳотлар ҳақиқатми ёки шунчаки оғизда айтилган гапларми, билишга интилмоқда, бироқ мен сўнгги беш йил давомида бу ерда бўлиб шуни айтишим мумкинки, ислоҳотлар ҳақиқатда амалга оширилди.
Улар чет эл капиталининг кириб келиши ва табиий ресурслар ёки меҳнат бозоридан фойдаланиши учун инфратузилма ва муҳитни яратмоқда, бу ерда аҳолининг 60 фоизи 30 ёш ва ундан кичик, шунинг учун демографик жиҳатдан бутун дунё бўйлаб бизнесни кўчириш ва келажакда сармоя киритиш учун жой қидираётган бўлсангиз бу ажойиб имконият”, — дея қўшимча қилди Паттерсон.
Сўнгги беш йилда Европа тикланиш ва тараққиёт банки Ўзбекистон иқтисодиётининг муҳим тармоқларига 3 миллиард евродан ортиқ маблағ ажратди, бу 100 дан ортиқ лойиҳаларга тақсимланди, ҳар йили киритилган сармоя миқдори эса аввалгисидан ошиб бормоқда.
Барқарор энергетика устувор вазифа ҳисобланади. BILLZ Ўзбекистондаги биринчи хусусий қуёш станцияларидан бирига кредит берди. Мамлакат сўнгги уч йил ичида Марказий Осиёда BILLZ молиялаштираётган етакчи давлат бўлди ва бундан ҳам кўпроқ сармоя киритиш режалаштирилмоқда.
Давлат-хусусий шериклик тўғрисидаги қонунчиликдаги ислоҳотлар, Ўзбекистоннинг 2030 йилга мўлжалланган яшил иқтисодиёт стратегияси ва давлат банкларини хусусийлаштириш сармояларнинг тобора кучайиб бораётганига сабаб бўлмоқда, дея тушунтирди ЕТТБнинг Ўзбекистондаги бўлими директори Алкис Дракинок: “Бу ислоҳотларнинг барчаси халқаро инвесторларга Ўзбекистоннинг салоҳияти ва ислоҳотларга содиқлиги ҳақида кучли сигнал беради”.
Ўзбекистоннинг технология борасидаги манзараси хорижлик инвесторларни ҳозир ниҳоятда ўзига тортмоқда. Асоси Лондонда жойлашган Sturgeon Capital инвестиция компанияси 2020 йилда 22,65 миллион евролик жамғарма орқали Ўзбекистоннинг стартаплари ва рақамли инфратузилмасига биринчи бўлиб сармоя киритганди.
“Биз эътибор қаратадиган учта йўналиш: финтех, бозорлар, одатда электрон тижорат бозорлари ва дастурий таъминот. Биз сармоя киритишни бошлаганимиздан бери бу компаниялар ўртача ҳисобда ўз даромадларини қарийб уч бараварга оширди ва ҳали олдинда узоқ истибол йўлаги борлигига ишонамиз”, — деб ишонтирди Sturgeon Capital инвестиция бўйича бош директори Киян Зандиеҳ.
Sturgeon Capital томонидан инвестициялар билан таъминлаган биринчи ўзбек стартапи BILLZ бўлди.
Ушбу компания чакана бизнесни бошқариш ва ривожлантиришга ёрдам берадиган дастурий таъминотни яратади. У аллақачон тўртта давлатда фаолиятини кенгайтирган ва янада кўпроқ инвесторларни жалб қилмоқда
“Беш йил олдин биз учун инвесторларни топиш жуда қийин эди ва бу жараён анча узоқ давом этди, чунки улар шунчаки йўқ эди. Энди молиялаштирувчиларни топиш анча осон ва потенсиал таклифлар ҳам беш йил олдингига қараганда анча катта. Буларнинг барчаси бизга келажакда кенгайиш ва ривожланиш имкониятини беради”, — деди BILLZ ҳаммуассиси ва бош директори Рустам Ҳамдамов.
Визасиз саёҳат, паст солиқлар ва ўқимишли аҳоли сонининг ортиши чет эл капиталини жалб қилишнинг асосий омиллари ҳисобланади. Ўзбекистонга сўнгги йилларда хорижий инвестициялар ҳажми сезиларли даражада ошди, давлат эса келгуси тўрт йил ичида 100 миллиард евродан ортиқ маблағ жалб этишни мақсад қилган.
Ўзбекистон сармоя, саноат ва савдо вазири Лазиз Қудратовнинг сўзларига кўра, ҳукумат мамлакатдаги ишбилармонлик муҳити ва сармоявий муҳитни янада жозибадор қилиш устида ишламоқда.
“Биз учун энг муҳими – Ўзбекистон иқтисодиётининг барқарор, узоқ муддатли ривожланишини таъминлаш, унинг рақобатбардошлигини ошириш учун инвестициялар сифатини таъминлаш”, — деди у.
Эслатиб ўтамиз бугун, 16 май куни Самарқандда Европа тикланиш ва тараққиёт банки Бошқарувчилар кенгашининг 32 йиллик йиғилиши бўлиб ўтмоқда. Тадбир “Мувофиқликка сармоя киритиш” (Investing in Resiliance) мавзусида ўтказилмоқда.
Изоҳ (0)