Тошкент мезбонлигидаги бокс бўйича Жаҳон чемпионатининг финалидан ўрин олган қатор жанглар 14 май, якшанба куни ўтказилди.
-63,5 кг вазн тоифаси вакили Руслан Абдуллаев финалда Мўғулистон вакили Чинзориг Батарсухга қарши жанг қилди. Ўзбекистонлик боксчи раундларни фаол ўтказди ва рақибига имкон қолдирмади. Якунда ҳакамлар Абдуллаевнинг 5:0 ҳисобидаги ғалабасини қайд этди.
Абдуллаев мусобақа давомида испаниялик Оер Ибаррече, Пуэрто-Рико вакили Мануэл Фебус, маврикийлик Ричанро Колин ва арманистонлик Хованец Бачковни мағлубиятга учратганди.
-71 кг вазнда Ўзбекистон шарафини ҳимоя қилган Саиджамшид Жаъфаров эса Қозоғистон Асланбек Шимбергенов билан жанг қилди. Биринчи раундда Қозоғистон вакилининг устунлиги остида ўтди. Иккинчи раундда Жаъфаров фаолликни оширди ва раундни 3:2 ҳисобида ўз фойдасига ҳал қилди. Ҳал қилувчи уч дақиқаликда устунлик намойиш қилган Асланбек якунда 5:0 ҳисобидаги ғалабани қўлга киритди.
Саиджамшид аввалги босқичларда мозамбиклик Осорио Муханга, мексикалик Марко Верде, нимчорак финалда Пуэро-Рико вакили Габриэль Лланосга қарши жанги эса рақибнинг жароҳати сабаб ўтказилмаганди. Чорак финалда Россия вакили Игор Свиридченковдан устун келган бўлса, ярим финалда бразилиялик Вандерсон Де Оливейрани енгганди.
Шу тариқа Жаъфаров Жаҳон чемпионати кумуш медалига эга чиққан иккинчи ўзбекистонлик бўлди. Аввалроқ Ойбек Жўраев ҳам финалда енгилиб, кумуш медал билан чекланганди.
Баҳодир Жалолов (+92 кг), Ҳасанбой Дўстматов (-51 кг) ва Асадхўжа Мўйдинхўжаев (-67 кг) ва Абдумалик Ҳалоков (-57 кг) Ўзбекистон делегациясига олтин медалларни тақдим этди.
Изоҳ (0)