Ўзбекистон U-20 терма жамоаси Жаҳон чемпионати олдидан Уругвай билан ўртоқлик ўйини ўтказди

Футбол бўйича Ўзбекистон U-20 терма жамоаси Ўзбекистон вақти билан 14 май тонгида Уругвайга қарши ўртоқлик ўйинида иштирок этди.

Учрашувнинг 70-дақиқасида Фабрисио Диас пенальтидан гол урган ҳолда уругвайликларни олдинга олиб чиқди. Ҳакам томонидан қўшиб берилган вақтда Андерсон Дуарте жамоасининг иккинчи голини урди.

Бу Равшан Ҳайдаров жамоаси учун Аргентинада ўтадиган U-20 Жаҳон чемпионати олдидан сўнгги ўйин бўлди.

Осиё чемпионлари 20 май куни мусобақанинг очилиш ўйинида Аргентинага қарши майдонга тушади. Шунингдек, А гуруҳидан Янги Зеландия ва Гватемала U-20 терма жамоалари ҳам ўрин олган.

Аввалроқ Ҳайдаров кичик мундиалга йўл олган таркибни эълон қилганди.