Тошкент мезбонлигидаги бокс бўйича Жаҳон чемпионатининг финалидан ўрин олган икки жанг якунланди.
-54 кг вазн тоифасида Ўзбекистон шарафини ҳимоя қилган Ойбек Жўраев ҳал қилувчи жангда қозоғистонлик Маҳмуд Сабирханга қарши рингга кўтарилди.
Биринчи раундда нисбатан тенг кураш кечди. Кейинги икки раундда эса Қозоғистон вакили яққол устунлик қайд этди, охирги раундда Жўраев икки марта нокдау ҳолатига ҳам тушди. Якунда ҳакамлар бир овоздан Сабирханнинг ғалабасини қайд этди.
Шу тариқа Жўраев мусобақада кумуш медалига эга чиқди.
-57 кг вазн тоифасида ҳаракат қиладиган Абдумалик Ҳалоков финалда Куба вакили Саидел Ҳортага тўқнаш келди.
Биринчи раундда ўзбекистонлик боксчи рақибини нокдаун ҳолатига туширди. Иккинчи раундни ҳам Абдумалик ўз ҳисобига ёздирди. Учинчи раунд тенг кураш остида ўтди. Ҳакамлар Ҳалоковнинг 5:0 ҳисобидаги ғалабасини қайд этди.
14 май куни яна икки нафар Ўзбекистон вакили жанг қилади.
- -63,5 кг: Руслан Абдуллаев — Чинзориг Батарсух (Мўғулистон)
- -71 кг: Саиджамшид Жаъфаров — Асланбек Шимбергенов
Аввалроқ Баҳодир Жалолов (+92 кг), Ҳасанбой Дўстматов (-51 кг) ва Асадхўжа Мўйдинхўжаев (-67 кг) финалда ғалаба қозониб, жаҳон чемпионига айланганди.
Изоҳ (0)