Жиззах вилояти Шароф Рашидов туманидаги Илмий тажриба станцияси томонидан электр тармоғига ўзбошимчалик билан уланиш ҳолати аниқланди. Бу ҳақда “Ўзэнергоинспекция” матбуот хизмати хабар берди.
Унга кўра, ҳолат Энергетика вазирлиги ҳузуридаги “Ўзэнергоинспекция” ва ҳуқуқни муҳофаза қилувчи органлар билан биргаликда жойларда ўтказилаётган назорат тадбирларида аниқланган. Қишлоқ хўжалиги вазирлиги ҳузуридаги билим ва инновациялар миллий марказига қарашли илмий тажриба станциясида электр энергиясидан ноқонуний фойдаланиш ҳолати кузатилди.
Ушбу станцияда қуввати 40 кВа бўлган трансформатор пункти электр энергиясидан фойдаланиш шартномасини расмийлаштирмасдан электр тармоғига улангани маълум бўлди. Натижада 984,2 минг кВт/соат ҳисобга олинмаган электр энергияси бўйича 442,9 миллион сўм миқдорида қайта ҳисоб ишлари амалга оширилди.
Қоидабузар истеъмолчига нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди. Назорат тадбирлари давом этмоқда.
Изоҳ (0)