Twitter ижтимоий тармоғида аудио ва видеоқўнғироқ функциялари пайдо бўлади

Twitter ижтимоий тармоғида тез орада аудио ва видео қўнғироқлар функциялари пайдо бўлади. Бу ҳақда ижтимоий тармоқ эгаси Илон Маск маълум қилди.

“Тез орада ушбу платформанинг ҳар бир фойдаланувчиси учун овозли ва видеочат пайдо бўлади ва сиз дунёнинг исталган нуқтасидаги одамлар билан телефон рақамингизни бермасдан мулоқот қилиш имкониятига эга бўласиз”, — деди Маск ўз хабарида.

Унга кўра, ижтимоий тармоқ мобил дастурининг сўнгги версиясида ҳам янгиликлар мавжуд.

Жумладан, Twitter функцияларига шахсий хабарларни шифрлаш имконияти ва мавзудаги аввал ёзилган ҳар қандай хабарга жавоб қайтариш функцияси қўшилади.

“Мобил дастурнинг сўнгги версиясида сиз мавзудаги исталган хабарга (нафақат охиргисига) шахсий хабар орқали жавоб юборишингиз ва ҳар қандай эможи реакциясидан фойдаланишингиз мумкин”, — деб ёзди Маск.