АҚШ Федерал тергов бюроси (ФТБ) халқаро шериклари билан хавфли дастур билан зарарланган халқаро компьютерлар тармоғини бартараф этди. Унинг ёрдамида Россия махсус хизматлари камида 50 та, жумладан, НАТОга кирувчи давлатлар, шунингдек, журналистларнинг махфий маълумотларини қўлга киритиб келган.
АҚШ Адлия вазирлиги баёнотида қайд этилишича, гап Snake зарарли дастури ҳақида кетмоқда. Америка ҳукуматининг маълумотларига кўра, дастурни Россия Федерал хавфсизлик хизматининг 16-маркази бўлинмаси ишлаб чиққан.
“Суд ҳужжатларида Турла деб келтириладиган мазкур бўлинма 20 йил давомида Snake’нинг турли версияларидан фойдаланган ҳолда дунёнинг камида 50 та, хусусан Шимолий Атлантика алянсига кирадиган давлатлардаги юзлаб компьютерлардан махфий маълумотларни ўғирлаб келган”, — дейилади идора баёнотида.
Қўлга киритилган ушбу ҳужжатлар “махфий тармоқ” орқали зарарланган компьютерлар орқали жўнатилган. Тергов хулосасига мувофиқ операцияни ФХХнинг Рязандаги бошқармаси назорат қилган.
ФТБ жосуслик дастурини махсус хизмат томонидан яратилган Perseus дастури ёрдамида ўчирган — у “зарарли Snake’ни ҳаётий муҳим компонентларини қайта ёзишга мажбурловчи буйруқларни берган”.
Изоҳ (0)