Тошкентда электробусларни қувватловчи станциялар етишмаётганига изоҳ берилди 

Тошкент шаҳрида электробусларни қувватловчи станциялар етишмаётгани ҳақида танқидий пост эълон қилинди. “Тошшаҳартрансхизмат” ҳолат юзасидан муносабат билдирди.

Қайд этилишича, жамоат транспорти учун олиб келинаётган автобус ва электробусларни автобус саройларида тақсимлаш, уларни сақлаш, хавфсиз ҳаракатланишини, сифатли техник хизмат кўрсатилишини таъминлаш мақсадида автобус саройларини қайта реконструкция қилиш дастури ишлаб чиқилиб, жорий йилнинг март ойидан бошлаб автобус саройларида модернизациялаш ишлари олиб борилмоқда.

Жумладан, харид қилинаётган электробусларни қувватлаш учун етарли миқдордаги энергия ресурслари билан таъминлаш мақсадида,  барча автобус саройлари ҳудудида қувватлаш ускуналари қуриб ишга туширилмоқда. 
 
Дастурга асосан, 1-автобус саройи филиалида 22 та, 4-автобус саройи филиалида 20 та, 7-автобус саройи филиалида 28 та, 8-автобус саройи филиалида 30 та, 18-автобус саройи филиалида 18 та, 5-автобус саройи филиалида 20 та электр станцияларини қуриш белгиланган.

Ҳозирги кунда жамиятнинг 8-Автобус саройи филиалида 30 та ва 7-автобус саройи филиалида 28 та электр станциялари тўлиқ ишга туширилган бўлиб, ушбу станциялар электробусларни 4-5 соат давомида тўлиқ қувватлаш имкониятини бермоқда. Тез кунларда автобус саройлари ҳудудида қурилаётган  80 та электр  қувватлаш станциялари фойдаланишга топширилиши белгиланган.