Ижтимоий тармоқларда бир эркак ЙПХ ходимлари билан жанжаллашиб, уларни ҳақорат қилаётгани акс этган видео тарқалди. Бухоро вилояти ИИБ ҳолат юзасидан маълумот берди.
Маълум қилинишича, 22 апрель куни фуқаро Н.Ў. Бухоро вилояти ИИБнинг 102 марказлашган тизимига мурожаат қилиб, ИИБ ходимлари билан ўрталарида келишмовчилик юзага келганини билдирган. Мазкур хабар Олот тумани ИИБда тегишли тартибда рўйхатга олиниб, масъул соҳавий хизматлар ходимлари томонидан ўрганилган.
Аниқланишича, 22 апрель куни соат 16:00 ларда Бухоро вилояти ИИБ ЖХХ ЙҲХБ 5-сафарбар гуруҳ ЙПХ инспекторлари катта сержант Ж.С. ҳамда сафдор К.Б. ўз хизмат ҳудуди ҳисобланган, туман марказидаги Маърифат кўчасида хизмат олиб бораётган вақтида, Nexiaъни бошқариб келаётган фуқаро Ф.Ж. шу кўчани кесиб ўтадиган йўлни ажратиб турувчи бетон тўсиққа бориб урилганига гувоҳ бўлган. Улар ҳолатни расмийлаштириш мақсадида ҳодиса жойига зудлик билан етиб келган.
Шу вақтда мазкур ҳолатга умуман алоқаси бўлмаган, Бухоро вилояти Давлат солиқ бошқармаси Қоракўл тумани бўлими маъмурий амалиёт юристи бўлган Н.Ў. (1993 йилда туғилган) ҳодиса жойига етиб келиб, ҳеч бир сабабсиз ҳолатни расмийлаштираётган ИИБ ходимларининг хизмат фаолиятига фаол қаршилик кўрсатган. У хизмат вазифаларини бажариб турган ходимларни турли ножўя сўзлар билан ҳақорат қилиб, куч ишлатиб, турли даражадаги тан жароҳатлари етказган.
Олиб борилган ўрганишлар ҳамда дастлабки тиббий текширув маълумотномасига кўра, мазкур ҳодиса натижасида катта сержант С.Ж.нинг ўнг қўл 4-, 5-бармоқларида ҳамда ўнг қўл тирсак соҳасида шилинма, сафдор Б.К.нинг эса бўйин соҳасида шилинма каби “соғлиқнинг бузилишига сабабчи бўлмаган енгил шикаст” тоифасига кирувчи тан жароҳатлари етказилгани аниқланган.
Мазкур ҳолат содир бўлган вақтда катта сержант С.Ж. ҳамда сафдор Б.К. ҳушёр ҳолда, хизмат вақти ҳамда хизмат кийимида бўлган.
Ҳозирда ушбу ҳолат юзасидан Олот тумани прокуратураси томонидан терговга қадар текширув ҳаракатлари олиб борилмоқда.
Изоҳ (0)