Олий Мажлис Қонунчилик палатасидаги “Адолат” фракциясининг йиғилишида “Ўзбекистон Республикаси Меҳнат кодексининг 208-моддасига қўшимча ва ўзгартиш киритиш тўғрисида”ги қонун муҳокама қилинди.
Таъкидланишича, ҳозирда касаба уюшмалари тизимида 34 мингдан ортиқ бошланғич ташкилотлар самарали фаолият кўрсатиб, соҳа бўйича 6 минг 700 дан зиёд ходим ва 300 мингга яқин фаоллар фидокорона хизмат қилмоқда.
11 ноябрь — Ўзбекистон касаба уюшмалари куни республиканинг барча ишчи-ходимлари томонидан нишонланади. Лекин амалдаги қонунчиликда 11 ноябрь ишланмайдиган байрам куни этиб белгиланмаган. Шунингдек, байрам тадбирларини ўтказишни ташкил этиш ҳамда ходимларни рағбатлантириш чораларини кўриш механизмлари белгиланмаган.
Мазкур қонун лойиҳаси билан Меҳнат кодексига 11 ноябрни ишланмайдиган байрам кунлари қаторига қўшишга қаратилган қўшимча киритилмоқда. Фракция аъзолари ушбу қонун лойиҳасининг қабул қилиниши ходимларнинг касбий, меҳнатга оид, ижтимоий-иқтисодий ҳуқуқларини таъминлаш тизимини янада кучайтиришга хизмат қилишини эътиборга олиб, уни қўллаб-қувватлади.
Шундан сўнг, педагог ходимнинг жамиятдаги мақомини юксалтириш, улар фаолияти билан боғлиқ ҳуқуқий, ижтимоий-иқтисодий муносабатларни тартибга солиш ва касбий камол топиши учун шароит яратиш ҳамда ҳуқуқий кафолатларини таъминлаш мақсадида ишлаб чиқилган “Педагог ходимнинг мақоми тўғрисида”ги қонун лойиҳаси кўриб чиқилди. Йиғилишда, шунингдек, бир қатор қонун лойиҳалари партия мақсад ва вазифаларидан келиб чиқиб қизғин муҳокама қилиниб, депутатлар томонидан маъқулланди.
Изоҳ (0)