Ўзбекистонда ўтказилган референдумнинг дастлабки натижалари эълон қилинди

Марказий сайлов комиссияси раиси Зайниддин Низомхўжаев Ўзбекистонда 30 апрель куни ўтказилган референдумнинг дастлабки натижаларини эълон қилди.

Унга кўра, “Референдумда Конституция тўғрисидаги Конституциявий қонунни қабул қиласизми деган саволга 19 миллион 722 минг 809 нафар фуқародан 15 миллион 40 минг 55 нафари (90,21 фоизи) ёқлаб, 1,5 миллион нафари қарши овоз берди. Сайлов бюллетенларининг 0,49 фоизи ҳақиқий эмас деб топилди.

 “Ўзбекистон Республикасининг референдуми тўғрисида”ги қонуннинг 38-моддасига кўра, овоз беришда иштирок этган фуқароларнинг ярмидан кўпроғи ёқлаб овоз берган бўлса, қарор референдумда қабул қилинган деб топилади.

“Шу муносабат билан, дастлабки маълумотларга таяниб, “Ўзбекистон Республикаси Конституцияси тўғрисида”ги Ўзбекистон Республикаси Конституциявий қонуни Ўзбекистон Республикаси халқи томонидан референдумда қабул қилинган дейишга барча асослар бор! Албатта, референдумнинг якуний натижалари Марказий сайлов комиссиясининг тегишли қарори қабул қилиниб, расмий эълон қилингандан сўнг кучга киради” — деди Зайниддин Низомхўжаев.

Унинг қайд этишича, референдум халқаро нормалар ва стандартларга, Ўзбекистон референдум қонунчилигига, унда белгиланган очиқлик ва ошкоралик каби умумеътироф этилган демократик принципларга тўла мос ҳолда ўтказилди.

Марказий сайлов комиссияси раиси референдумни ўтказиш жараёнларида унинг натижаларига таъсир қилмайдиган айрим камчиликлар кузатилганини ҳам қайд этиб ўтди.

Унинг билдиришича, 8-Сирдарё вилояти референдум округининг 226-сон, 10-Тошкент вилояти референдум округининг 651-сон, 14-Тошкент шаҳар референдум округининг 772-сон референдум участкаларида атрофлича кўриб чиқилиши лозим бўлган ҳолатлар аниқланди. Сирдарё ва Тошкент вилоятларидаги ҳолатлар Марказий сайлов комиссиясининг мониторинги натижасида аниқланган бўлса, Тошкент шаҳридаги ҳолат оммавий ахборот воситалари орқали аниқланган. 

Зайниддин Низомхўжаев уларнинг ҳар бири юзасидан Марказий сайлов комиссияси ва округ комиссиялари томонидан мутасадди идоралар билан биргаликда ўрганишлар олиб борилаётганини маълум қилди.

“Умуман олганда, республика бўйича 10 758 та участка фаолият олиб борганини ҳисобга оладиган бўлсак, референдум жараёнларида камчиликлар кузатилган участкалар 0,1 фоизни ҳам ташкил этмайди”, — дея қўшимча қилди у.