Ўзбекистонда ҳафта давомида бироз салқин ҳаво бўлиши кутилмоқда

“Ўзгидромет” прогнозларига кўра, ҳафтанинг иш кунлари республика бўйлаб бироз салқинроқ ҳаво кутилади.

1 май куни Ўзбекистон бўйича қуруқ об-ҳаво бўлади, фақат кун давомида Фарғона водийсининг айрим тумаларида ёмғир ёғиши момақалдироқ бўлиши мумкин. Шимол ва чўл ҳудудларининг айрим жойларида шамол тезлиги 15-18 метр/секундгача кучаяди. Кундузи ҳаво ҳарорати 28-33 даражани ташкил этади.

Иш ҳафтаси давомида Қозоғистон ҳудудларидан Ўзбекистонга нисбатан кучсиз салқин ҳаво оқими кириб келиши кутилмоқда, бунинг ҳисобига ҳарорат бироз пасаяди. Республика бўйича ёғингарчиликсиз об-ҳаво сақланиб туради, фақат 4 май куни республиканинг шимолий ҳудудлари бўйича қисқа муддатли ёмғир ёғиши, момақалдироқ бўлиши мумкин.

Сешанба ва чоршанба кунлари шимолда ва чўл ҳудудларида, пайшанба ва жума кунлари эса республика бўйича шамол тезлиги 15-18 метр/секундгача кучаяди, шимолда ва чўл ҳудудларида 4 ва 5 май кунлари 20-23 метр/секундгача кучайиши мумкин.

Ҳафта давомида ҳарорат барқарор бўлиши кутилмоқда. Кундузи ҳарорат 25-30 даража атрофида бўлади.