Ўзбекистон элчиси Виталий Фен Жанубий Корея Ташқи ишлар вазирлигининг Европа масалалари бўйича бюроси бош директори, Ўзбекистон билан икки томонлама ҳамкорликка масъул Чае Те Хо билан учрашди. Бу ҳақда “Дунё” агентлиги хабар берди.
Қайд этилишича, мулоқот чоғида кўп қиррали Ўзбекистон—Жанубий Корея махсус стратегик шериклигини янада чуқурлаштиришнинг амалий жиҳатлари кўриб чиқилган.
Томонлар мамлакатлар ўртасидаги муносабатлар савдо-иқтисодий, сиёсий, маданий-ҳуманитар ва бошқа ўзаро манфаатли соҳаларда, шунингдек, парламентлараро ҳамкорлик орқали жадал ривожланиб бораётганини қайд этган.
“2023 йилда турли даражаларда ўтказиладиган тадбирлар жадвали юзасидан маълумотлар алмашилиб, уларга биргаликдаги саъй-ҳаракатлар билан ҳар томонлама пухта тайёргарлик кўриш муҳимлигига алоҳида эътибор қаратилди”, — дейилади хабарда.
Томонлар расмий Сеул ва Тошкент ўртасидаги алоҳида стратегик шерикликни янада ривожлантириш, шунингдек, кўп асрлик дўстликни ривожлантириш учун биргаликдаги саъй-ҳаракатларни амалга оширишга тайёр эканликларини тасдиқлаган.
28 апрель куни Табиат ресурслари вазирлиги ва Жанубий Кореянинг Sejin G&E Со., LTD. компанияси ўртасида қиймати 55 миллион АҚШ долларига тенг битим имзоланган. Мазкур битим маиший чиқиндилар полигонларида ҳосил бўладиган чиқинди газини қайта ишлаш ҳисобига электр энергияси ишлаб чиқариш бўйича инвестиция лойиҳасини амалга оширишга қаратилган.
Изоҳ (0)