O‘zbekiston elchisi Vitaliy Fen Janubiy Koreya Tashqi ishlar vazirligining Yevropa masalalari bo‘yicha byurosi bosh direktori, O‘zbekiston bilan ikki tomonlama hamkorlikka masʼul Chaye Te Xo bilan uchrashdi. Bu haqda “Dunyo” agentligi xabar berdi.
Qayd etilishicha, muloqot chog‘ida ko‘p qirrali O‘zbekiston—Janubiy Koreya maxsus strategik sherikligini yanada chuqurlashtirishning amaliy jihatlari ko‘rib chiqilgan.
Tomonlar mamlakatlar o‘rtasidagi munosabatlar savdo-iqtisodiy, siyosiy, madaniy-humanitar va boshqa o‘zaro manfaatli sohalarda, shuningdek, parlamentlararo hamkorlik orqali jadal rivojlanib borayotganini qayd etgan.
“2023-yilda turli darajalarda o‘tkaziladigan tadbirlar jadvali yuzasidan maʼlumotlar almashilib, ularga birgalikdagi saʼy-harakatlar bilan har tomonlama puxta tayyorgarlik ko‘rish muhimligiga alohida eʼtibor qaratildi”, — deyiladi xabarda.
Tomonlar rasmiy Seul va Toshkent o‘rtasidagi alohida strategik sheriklikni yanada rivojlantirish, shuningdek, ko‘p asrlik do‘stlikni rivojlantirish uchun birgalikdagi saʼy-harakatlarni amalga oshirishga tayyor ekanliklarini tasdiqlagan.
28-aprel kuni Tabiat resurslari vazirligi va Janubiy Koreyaning Sejin G&E So., LTD. kompaniyasi o‘rtasida qiymati 55 million AQSH dollariga teng bitim imzolangan. Mazkur bitim maishiy chiqindilar poligonlarida hosil bo‘ladigan chiqindi gazini qayta ishlash hisobiga elektr energiyasi ishlab chiqarish bo‘yicha investitsiya loyihasini amalga oshirishga qaratilgan.
Izoh (0)