Олий таълим, фан ва инновациялар вазирлиги “Олий таълим муассасалари талабаларини турар-жой билан таъминлаш тизимини такомиллаштириш чора-тадбирлари тўғрисида”ги Вазирлар Маҳкамаси қарори лойиҳасини муҳокамага қўйди.
Ўзбекистон президентининг фармони билан тасдиқланган 2022—2026 йилларга мўлжалланган Янги Ўзбекистоннинг тараққиёт стратегиясини “Инсонга эътибор ва сифатли таълим йили”да амалга оширишга оид давлат дастурида талабаларни ётоқхонага онлайн жойлашиш имкониятларини берувчи, Давлат хизматлари маркази ва Ягона интерактив давлат хизматлари портали орқали кўрсатиладиган бепул электрон хизматни жорий этиш белгиланган. Бунда:
- ётоқхоналар ҳисобини юритиш реестрини ишлаб чиқиш;
- ижтимоий ҳимояга муҳтож талабаларни устувор равишда жойлаштириш;
- Ягона интерактив давлат хизматлари портали орқали электрон ариза бериш ва тўловларни амалга ошириш имкониятини яратишни назарда тутиш белгиланган.
Ҳужжат лойиҳасига мувофиқ, 2023 йил 1 сентябрдан бошлаб давлат олий таълим муассасалари талабаларига ижара тўловининг бир қисмини давлат бюджети ҳисобидан қоплаб беришнинг соддалаштирилган тартиби жорий этилади.
Бунда:
- талабгорларга ойлик ижара тўловининг бир қисми ижара шартномасининг суммасидан қатъи назар Тошкент шаҳрида – базавий ҳисоблаш миқдорининг бир баравари (300 минг сўм), қолган ҳудудларда – базавий ҳисоблаш миқдорининг ярим баравари миқдорида тўланади;
- ижара шартномасида икки ва ундан ортиқ талабаларни расмийлаштиришда хонадоннинг майдони ҳар бир талаба учун 12 метр квадратдан кам бўлмаслиги лозим;
- талабалар сафига қабул қилинган ва талабалар турар жойи билан қамраб олинмаган олий таълим муассасасидан узоқ жойлашган ҳудудлардан келган биринчи босқич талабалари (доимий яшаш жойи бошқа туманда (шаҳарда) бўлган ижара асосида яшайдиган талабалар)га, олий таълим муассасаларига ушбу мақсадларда ажратилган маблағлар доирасида сентябрь ва октябрь ойлари учун ижара шартномаси талаб этмасдан ойлик ижара тўловининг бир қисми қоплаб берилади ҳамда белгиланган тартибда ижара шартномаси тақдим этган талабаларга ноябрь ойидан тўловлар давом эттирилади;
- давлат олий таълим муассасалари томонидан ижара ҳуқуқи асосида яшаётган, бироқ ижара тўловлари ушбу қарорда белгиланган тартибда давлат бюджети ҳисобидан қопланадиган талабаларнинг 60 фоизидан ортган қисми учун ойлик ижара тўлови бир қисмини ушбу олий таълим муассасаси томонидан тасдиқланган мезонлар ва тартиб асосида молиявий имкониятидан келиб чиқиб бюджетдан ташқари маблағлари ҳисобидан қоплаб берилиши мумкин.
Талабалар билан тузиладиган турар жой ижара шартномаларини давлат солиқ хизмати органларида солиқ тўловчининг шахсий кабинети орқали масофадан туриб биометрик идентификациялаш (Face-ID) технологияси орқали электрон шаклда реал вақт режимида ҳисобга қўйишга рухсат этилади.
Белгиланишича, 2023/2024-ўқув йилидан бошлаб давлат олий таълим муассасалари талабаларини ётоқхонага жойлаштириш онлайн шаклда амалга оширилади.
Талабаларни ётоқхонага онлайн жойлашиш имкониятларини берувчи Давлат хизматлари маркази ва Ягона интерактив давлат хизматлари портали орқали кўрсатиладиган бепул электрон хизматни жорий этишнинг маъмурий регламенти иловага мувофиқ тасдиқлансин ва 2023/2024-ўқув йилидан бошлаб амалиётга жорий этилади.
Бунда:
- Билим ва малакани баҳолаш агентлиги томонидан 2023/2024-ўқув йилидан бошлаб абитуриентлар учун Давлат олий таълим муассасаларига ўқишга ҳужжат топшириш жараёнида талабалар турар жойига бўлган эҳтиёжни белгилаш имконияти яратилади;
- 2023/2024-ўқув йилидан бошлаб талабалар ётоқхонага жойлашиш учун фақат давлат хизматлари марказлари ёки Ягона интерактив давлат хизматлари портали орқали мурожаат қилади;
- Давлат хизматлари марказлари ёки ЙИДXП орқали электрон ариза бериш ва тўловларни амалга оширишда давлат хизматини кўрсатиш комиссия маблағлари ундирилмайди.
Шавкат Мирзиёев 2021 йилнинг апрель ойида ижарада яшаётган талабаларга 1 майдан бошлаб ижара тўловининг ярми давлат томонидан қоплаб берилишини айтганди. Кейинчалик ижара тўлови харажатларининг 50 фоизи БҲМнинг бир бараваридан ошмаган тақдирда тўлаб берилиши маълум бўлган. Сентябрь ойида талабаларга ижара тўловининг бир қисмини қоплаб бериш тартиби белгиланганди.
Изоҳ (0)