МИБ Наманган вилояти бошқармаси қидирув шўбаси инспекторлари томонидан олиб борилаётган тезкор тадбирлар давомида жорий йилнинг 4-ойи давомида алимент тўлашдан бўйин товлаб келаётган қарздорлардан 43 нафари топилди. Бу ҳақда “Дарё” мухбири Азизбек Абдувалиев хабар бермоқда.
Ҳозирда бошқарма иш юритувида бўлган ижро ҳужжатлари бўйича 94 нафар қарздорни қидириб топиш чоралари кўрилмоқда. Қидирувга берилган ушбу шахслардан 56 нафарининг чет элга чиқиб кетганлиги аниқланди ва уларга нисбатан давлатлараро қидирувни амалга ошириш бўйича сўровномалар юборилди. Улардан 34 нафари Россия, 18 нафари Қозоғистон, 2 нафари Туркия, қолганлари эса Жанубий Корея ва Белорусда эканлиги маълум бўлди.
Шунингдек, 38 нафар маҳаллий қидирувга берилган қарздорларни топиш бўйича ҳуқуқни муҳофаза қилиш идоралари билан ҳамкорликда иш олиб борилмоқда ва топиш чоралари кўрилмоқда.
Жумладан, фуқаролик ишлари бўйича Учқўрғон туманлараро судининг қарздор Ғуломжон Адашевдан (исм-шарифлар шартли) ундирувчи Гулноза Юсупова фойдасига бир нафар вояга етмаган фарзанди учун алимент ундириш ҳақидаги ҳал қилув қарори ижросини таъминлаш жараёнида ота 12 миллион сўмдан ортиқ қарздорликни тўлашдан бўйин товлаб келгани ва яшаш жойидан топиш имкони бўлмаганлиги боис унга нисбатан қидирув эълон қилинган.
Олиб борилган қидирув ишлари натижасида қарздор ота Тошкент шаҳри худудида юрганлиги аниқланган ҳамда ички ишлар ходимлар билан ҳамкорликда топилган. Видеоконфренсалоқа режимида кўрилган суд жараёнида унга нисбатан 15 сутка маъмурий қамоқ жазоси тайинланди.
Изоҳ (0)