Илҳом Қиличхонов Тошкент вилоятининг Нурафшон шаҳри ҳокими этиб тайинланди. Бу ҳақда “Дарё” манбаси хабар берди.
Мазкур хабарни Тошкент вилояти ҳокимлиги ахборот хизмати раҳбари Беҳзод Қобулов ҳам тасдиқлади.
Илҳом Қиличхонов тайинловга қадар Қурилиш ва уй-жой коммунал хўжалиги соҳасида назорат қилиш инспекцияси бошлиғи ўринбосари вазифасида ишлаган.
Тошкент вилояти ҳокими Зоир Мирзаев Нурафшон шаҳрида бўлиб ўтган Халқ депутатлари шаҳар кенгашида президент тадбиркорларга кенг имконият яратаётганини, бундай пайтда ҳокимлар ҳам тадбиркорларни қўллаб-қувватлаши лозимлигини уқтириб, “ҳудуд ҳокимларининг тадбиркорга қўлини кўксига қўйиб ака дегани 10 та иш ўрни яратилади дегани”, деди.
Нурафшон шаҳри ҳокимлари
2019 йилда Нурафшон шаҳри ҳокими Усмон Ҳакимов Олмалиқ шаҳри ҳокими этиб тайинланган эди. Кўп ўтмай унинг ўрнига “Тошуйжой ЛИTИ” акциядорлик жамияти бош директори лавозимида фаолият юритган Қаҳрамон Ҳакимов тайинланган.
2020 йилда ижтимоий тармоқларда Қаҳрамон Ҳакимовнинг туғилган кунига атаб тайёрлангани айтилган, бир гуруҳ йигитлар томонидан куйланган қўшиқ тарқалганди. Жўшиб қўшиқ айтган ёшлар шу ҳоким даврида Нурафшон ўзгача қиёфа касб этганини мадҳ этган. 2021 йил январь бошида у лавозимидан озод этилди.
2021 йил январида эса собиқ уй-жой коммунал хизмат кўрсатиш вазири Музаффар Солиев Нурафшон ҳокими этиб тайинланганди. 2023 йилнинг апрель бошларида Музаффар Солиев ишдан олингани маълум бўлди. “Kun.uz” манбасига кўра, Солиев уй-жой коммунал хўжалик вазири лавозимидаги фаолияти билан боғлиқ иш юзасидан терговга жалб этилган бўлиши мумкин.
Изоҳ (0)