Россия президенти Владимир Путиннинг қизлари Екатерина Тихонова ва Мария Воронцовага тегишли экани айтилаётган компаниялар Украинадаги урушнинг бир йиллиги давомида 1,2 миллиард рублдан (14 млн доллар) кўпроқ даромад топди.
.jpg)
Маълум қилинишича, тарихда биринчи марта мазкур фирмаларнинг фойдаси 1 миллиард рублдан (12,4 млн доллар) ошди. Мисол учун, Воронцовага тегишли бўлган “Новая медицинская компания” (Номеко) 2022 йилда 855 миллион рубль (10,6 млн доллар) даромад олишга муваффақ бўлди.
Фирма ядро тиббиёти соҳасидаги лойиҳалар билан шуғулланади, шунингдек, Россиянинг Ленинград вилоятида кўп функсионал тиббиёт мажмуасини ташкил этишда иштирок этади.
Журналистларнинг сўзларига кўра, 2019 йилда компания фаолияти фойдасиз бўлган. 2022 йилда Номеко “Вагнер” ёлланма аскарлари даволанадиган “СОГАЗ Медицина” клиникаларини сотиб олган. “Номеко бошқарув” шўба корхонаси яна 7 миллион рубль (87 минг доллар) даромад топган.
Хабарда Екатерина Тихоновага тегишли Миллий интеллектуал ривожланиш жамғармаси (НИР) 2022 йилда 265 миллион рубль (3,30 млн доллар) даромад олгани айтилади. Ўтган йили жамғармага тегишли бўлган бешта шўба корхона яна 26 миллион рубль (324 минг доллар) даромад топган.
Маълум қилинишича, НИР нефть қазиб олиш, геология, биотехнология ва кимё соҳаларида тадқиқот олиб боради. Тихонова у ерда бош директор лавозимини эгаллайди.
Эслатиб ўтамиз, 13 январь куни россиялик журналистлар Путиннинг қизлари 2022 йилда тўғридан тўғри 10 миллион рубль (125 минг доллар) ишлаб топгани ҳақида хабар берганди. Ўтган йили Россия президенти Владимир Путиннинг тўнғич қизи Мария Воронцова 9,6 миллион рубль (120 минг доллар), энг кичиги Катерина Тихонова эса 5,7 миллион рубль (71 минг доллар) ишлаб топган.
Изоҳ (0)