Россия Украинага қарши урушда фойдаланадиган Эроннинг Shahed 136 дронлари ўғирланган Ғарб технологиясидан фойдаланган ҳолда ишлаб чиқилган. Бу ҳақда Британиянинг қурол компонентларини ўрганиш билан шуғулланувчи Cонфлиcт Армамент Research (CAR) ташкилотига таяниб, CNN хабар берди.
Хусусан, Эрон томонидан Россияга сотилган дронлар Германия технологияси асосидаги двигатель билан жиҳозланган. Технология 20 йил олдин Теҳрон томонидан ноқонуний равишда қўлга киритилган ва Shahed 136 двигатели Буюк Британия, АҚШ ва Европа Иттифоқи санкциялари остидаги Mado номи билан танилган Эроннинг Oje Parvaz Mado Nafar компанияси томонидан қайта ишлаб чиқарилган.
2022 йилнинг ноябридан жорий йилнинг мартигача CAR Украинада Эронда ишлаб чиқарилган 20 та дрон ва ўқ-дориларнинг таркибий қисмларини текширишга муваффақ бўлди, уларнинг ярмига яқини Shahed 136.
Текширув давомида Shahed 136 двигатели Эрон компанияси томонидан қайта ишлаб чиқилгани ҳақидаги далил аниқланган. Mado дрон двигателларининг дизайни шуни кўрсатадики, Эрон 20 йил олдин халқаро санкциялар даврида ўзининг дрон ва ракеталари учун Ғарб технологиясини қўлга киритишга қаттиқ ҳаракат қилган.
2006 йилда Эрон Германиянинг Limbach Flugmotoren компаниясидан ноқонуний равишда дрон двигателларини қўлга киритган. Уч йил ўтгач, Юсуф Абуталебий исмли эронлик муҳандис унинг Mado компанияси дрон двигателини яратганини эълон қилган.
Эрон компанияси Shahed дронларини яратишдаги ролини яширишга ҳаракат қилган бўлиши мумкин. Мутахассислар Украинада топилган дронларнинг таркибий қисмларининг асл серия рақамлари ўчирилганини аниқлади. Бу дронларнинг келиб чиқишини яшириш мақсадида амалга оширилгани айтилмоқда.
Эрон томонидан қўлга киритилган ва нусхаси кўчирилган бошқа Ғарб компонентлари орасида Чехияда ишлаб чиқарилган двигатель мавжуд. У Эроннинг Heidar-2 ракетасига ўрнатилган.
Изоҳ (0)