Қозоғистонда 5 ва 6 кунлик иш ҳафтаси билан бир қаторда 4 кунлик иш ҳафтасига ўтилади. Бу ҳақда “Kazinform” хабар берди.
Хабарга кўра, 2023 йил 1 июндан “Қозоғистон Республикасининг айрим қонун ҳужжатларига ижтимоий таъминот масалалари бўйича ўзгартиш ва қўшимчалар киритиш тўғрисида”ги қонун билан мамлакат Меҳнат кодексига бу борада тегишли ўзгартиришлар киритилади. Яъни, томонларнинг келишувига кўра, меҳнат шартномасида беш кунлик ёки олти кунлик иш ҳафтасини алмаштириб туриш ҳуқуқи билан бирга тўрт кунлик иш ҳафтасини белгилаш мумкин бўлади.
Шу билан бирга, қўшимча ишларнинг умумий давомийлиги тўрт кунлик, беш кунлик ва олти кунлик иш ҳафтаси билан ойига 12 соатдан ва иш вақтининг умумлаштирилган ҳисоби ўрнатилганда йилига 120 соатдан ошмаслиги керак.
Гарчи янги тартиб жорий этилса-да, мамлакатда беш ва олти кунлик иш ҳафталари сақланиб қолади. Умумий дам олиш куни якшанбага тўғри келади, қолган дам олиш кунлари жамоа шартномасида ва меҳнат қоидаларига кўра белгиланади.
Изоҳ (0)