Қозоғистон Миллий хавфсизлик қўмитасининг (МХҚ) собиқ раҳбари Карим Масимов 18 йилга озодликдан маҳрум этилди. Бу ҳақда Остона суди сайтида хабар берилди.
Масимов давлатга хиёнат, ҳокимиятни эгаллашга уриниш, мансаб ваколатини суиистеъмол қилишда айбдор деб топилди.
“Жазоларни қисман қўшиб, ниҳоят жазо тайинланди — мулки мусодара қилинган ҳолда 18 йил муддатга озодликдан маҳрум қилиш, давлат хизматидаги лавозимларни эгаллаш ҳуқуқидан умрбод маҳрум қилиш”, — дейилади суд хабарида.
Бундан ташқари, МХҚ раисининг собиқ ўринбосари Ануар Садиқулов ҳам Масимов билан бир хил моддалар бўйича айбдор деб топилган. Унга қарши 16 йиллик қамоқ жазоси тайинланган.
МХҚ раисининг собиқ ўринбосари Даулет Ергожин ҳокимиятни зўрлик билан эгаллаб олиш ва мансаб ваколатини суиистеъмол қилишда айбдор деб топилиб, 15 йилга қамалди.
МХҚ раҳбарининг собиқ ўринбосари Марат Осипов мансаб ваколатини суиистеъмол қилишда айбдор деб топилиб, суд уни давлат хизматида лавозим эгаллаш ҳуқуқидан маҳрум қилиб, уч йилга озодликдан маҳрум қилди.
Масимов, Садиқулов, Ергожин ва Осиповлар унвонлари ва давлат мукофотларидан маҳрум қилинди. Суд ушбу ишлар бўйича давлат даромади учун 10 миллиард тенгедан (21,9 миллион доллардан ортиқ) ва 24 миллион доллардан ортиқ маблағ ундирди.
Масимовнинг лавозимидан кетиши
Қозоғистон президенти Қосим-Жўмарт Тўқаевнинг 2022 йил 5 январдаги фармони билан Масимов мамлакатдаги тартибсизликлар туфайли МХҚ раиси лавозимидан озод этилганди. 8 январь куни МХҚ Массимов давлатга хиёнатда гумон қилиниб, ҳибсга олинганини маълум қилди. 7 ноябрь куни Қозоғистон Бош прокуратураси Масимовга қарши жиноий ишни судга юборди.
Изоҳ (0)