Украинадаги урушда “Вагнер” сафида жанг қилган ўзбекистонлик Б.А. ва Ш.Ж. Самарқандда дафн этилди. 19 январь куни уларнинг жасади Булунғур туманига олиб келинган. Бу ҳақда Curрент Times хабар берди.
Маълум қилинишича, улар шахси аниқланиши мумкин бўлган, жасадлари “Украинадаги урушда ҳалок бўлган” деган ҳужжат билан ватанига жўнатилган биринчи ўзбекистонликлардир.
Қамоқдан урушга
23 ёшли Ш.Ж. собиқ меҳнат муҳожири бўлиб, Россия қамоқхонасида жазо муддатини ўтаган. Қариндошлари унинг урушга қандай боргани ва қандай ҳалок бўлганини билмаслигини айтди. Самарқанд вилояти ФҲДЙ бўлими томонидан берилган ҳужжатда Ш.Ж.нинг ўлимига кўп миқдорда қон йўқотиши сабаб бўлгани келтирилади. Қариндошлари тобут билан бирга олган ўлим ҳақидаги гувоҳномада Ш.Ж. 2022 йилнинг 16 декабрида Украинанинг Донецк вилоятида вафот этгани ёзилган. Айнан ўша ерда фронт чизиғи ўтган ва шиддатли жанглар кечмоқда.
.jpg)
19 январь куни Самарқанд вилояти Булунғур тумани Қора Қамар қишлоғига яна бир маҳаллий фуқаро 26 ёшли Б.А.нинг жасади бўлган тобут олиб келинган. У ҳам Украинада вафот этган ва меҳнат муҳожири сифатида Россияда бўлган. Марҳум саккиз ой олдин қамалган.
У 2022 йил отаси билан телефон орқали суҳбатда паспортининг муддати ўтгани учун қамоқда эканини айтган, бироқ бошқа тафсилотларни келтирмаган. Б.А.нинг қариндошлари у қандай қилиб урушга ёлланганини ва ўлими тафсилотларини билмайди. Улар фақат Б.А. 15 декабрь куни ҳалок бўлганидан хабардор.
Йигитнинг дўсти унинг Россиядаги танишлари билан мулоқот қилиш имконига эга бўлган. У Б.А. бошқа маҳбуслар сингари Украинадаги урушга “Вагнер” томонидан ёлланганини айтган. Унинг сўзларига кўра, хусусий ҳарбий компания вакиллари Б.А.дан Украинада бор-йўғи бир ой жанг қилса, оқланишини, шундан сўнг ватанига жўнаб кетишини ва қўшимча равишда уч минг доллар олишини ваъда қилган.
Марҳум бу ҳақда дўстига айтган ва ундан оиласига ҳеч нарса демасликка ваъда олган, онасининг соғлиғидан қўрқишини билдирган. Б.А. оилада ёлғиз ўғил бўлган. Бир неча йил олдин у Россияга ишлаш учун кетган ва у ерда турли хил қора ишлар билан шуғулланган.
Россияда муҳожирлар ҳуқуқларини ҳимоя қилиш билан шуғулланувчи адвокат Ботир Шермуҳаммаднинг айтишича, ўзбекистонлик маҳбусларнинг жасадлари Россиянинг Ростов вилоятида тўпланиб, кейин Ўзбекистонга жўнатилади.
Изоҳ (0)