Germaniya O‘zbekiston fuqarolarini ishga taklif qilmoqda. Maosh 2,4 ming yevrodan boshlanadi

Germaniyada ishlash istagida bo‘lgan o‘zbekistonliklardan turli sohalar bo‘yicha ishlarga arizalar qabul qilinmoqda. Bu haqda Tashqi mehnat migratsiyasi agentligi ma’lum qildi.

Nomzodlar quyidagi sohalarda ishga taklif etiladi:

• payvandchi;
• muhandis-mexanik;
• sanoat mexanigi;
• mexatronika muhandisi;
• ombor logistikasi;
• metall texnologiyasi muhandisi.

Ishchilarga 2 420 yevrodan boshlab oylik maosh ajratiladi, O‘zbekistondan Germaniyaga aviachipta va transfer xarajatlari ish beruvchi tomonidan qoplab beriladi. Ularga arzonlashtirilgan yashash joy topishga yordam beriladi hamda haftasiga 40 soat ish bilan ta’minlanadi.

Nomzodlar uchun malaka va til majburiyatlari:

• 45 yoshgacha bo‘lishi;
• nemis tilidan Gyote yoki ECL dan olingan A2 sertifikat (A1 sertifikatiga ega fuqarolar ham ro‘yxatdan o‘tishlari mumkin va ular tanlab olinib, viza hujjatlari boshlangunga qadar til bilimini tasdiqlovchi A2 sertifikat taqdim etishlari lozim);
• sanoat mexanigi, mexatronika texnigi, metall texnologiyasi bo‘yicha mutaxassis, maxsus ombor xodimi, qishloq xo‘jaligi va texnikasi mexanigi/mexatronika texnika kabi sohalarda kasbiy ta’limni tamomlagan va o‘rta maxsus ta’lim olgani haqida diplom;
• avtomobilsozlik, mashinasozlik, agrar xo‘jaligi mashinasozligi texnik yo‘nalishida bakalavr diplom;
• sohada kamida bir yillik tajribaga ega bo‘lishi.

Qayd etilishicha, qishloq xo‘jaligi yoki qurilish texnikasi sanoati va sanoat logistikasi hamda gidravlika yoki elektron komponentlarni yig‘ish, forkliftlarni (stapler) haydash tajribasi tanlov jarayonida afzallikka ega.

Nomzodlarlarga moslashuvchan, smena ishlash, jamoada ishlash qobiliyati va mas’uliyati, texnik qobiliyatga ega bo‘lishi, sudlanmagan va jismonan sog‘lom bo‘lishi kabi qo‘shimcha talablar ham mavjud.

Nomzodlar xorijga chiqish pasporti, kollej, texnikum yoki bakalavr diplomi, nemis tilini bilish haqidagi sertifikat, sudlanmaganlik tog‘risida tasdiqnoma hamda tarjimai hol (Lebenslauf)ni pdf shaklda onlayn jo‘natishi kerak. Arizalar quyidagi havola orqali qabul qilinadi.

Aprel o‘rtalarida Tashqi mehnat migratsiyasi agentligi chet elda ishlamoqchi bo‘lgan O‘zbekiston fuqarolari uchun Germaniya, Isroil, Yaponiya, Rossiya, Latviya, Litva, Bolgariya, Polsha davlatlariga bo‘sh ish o‘rinlari taklif etilyotganini ma’lum qilgandi. Shuningdek, Bandlik va mehnat munosabatlari vazirligi boshqarma boshlig‘i Zohid Asqarov ayrim firibgarlar chet elga ishlash uchun yuborishini aytib fuqarolardan 6 ming dollargacha pul olayotgani, aldanganlar puldan ham, xorijda ishlashdan ham quruq qolayotganini aytgandi.