Ўзбекистоннинг барча ҳудудларида ҳаво ҳарорати кўтарилиши давом этади

“Ўзгидромет” 25–28 апрель кунларига об-ҳаво прогнозини эълон қилди.

Унга кўра, ҳафта давомида Ўзбекистон бўйича ҳаво асосан кам булутли бўлади, ёғингарчилик кутилмайди. Фақат Фарғона водийсининг айрим тоғли ҳудудларида ва республика жанубида баъзи жойларда қисқа муддатли ёмғир ёғиши, момақалдироқ бўлиши мумкин.

25 апрелда шимолда ва чўл ҳудудларида баъзи жойларда шамол тезлиги 15-20 метр/секундгача кучайиши мумкин.

Республиканинг барча ҳудудларида ҳароратнинг кўтарилиши давом этади. Ҳаво ҳарорати кечалари 13-15 даражагача, баъзи жойларда 16-18 даражагача, кундуз кунлари 30-33 даражагача, чўл ҳудудлари ва республика жанубининг баъзи жойларида 35-37 даражагача кўтарилади.

Қайд этилишича, бу апрель ойининг охирги ўн кунлик меъёрий қийматларидан 4-6 даражага юқоридир.

Тошкентда иш ҳафтасининг охиригача ҳаво бироз булутли бўлади, ёғингарчилик кутилмайди. Шамол 3-8 метр/секунд тезликда эсади. Ҳарорат асосан кечаси 12-14 даража, кундузи 28-30 даража бўлади.