Germaniya, Yaponiya va Polsha kabi davlatlar o‘zbekistonliklarga bo‘sh ish o‘rinlarini taklif etmoqda

Chet elda ishlamoqchi bo‘lgan O‘zbekiston fuqarolari uchun Germaniya, Isroil, Yaponiya, Rossiya, Latviya, Litva, Bolgariya, Polsha davlatlariga bo‘sh ish o‘rinlari taklif etilmoqda. Bu haqda Tashqi mehnat migratsiyasi agentligi xabar berdi.

Qayd etilishicha, xorijning vakolatli tashkilotlari va salohiyatli ish beruvchilari bilan olib borilgan muzokaralar natijasida Buyuk Britaniya, Bolgariya, Latviya, Polsha, Germaniya, Rossiya, Qozog‘iston kabi davlatlardan 33 ta tashkilot bilan hamkorlik kelishuvlari imzolanib, ularda 4,5 mingdan ortiq bo‘sh ish o‘rinlari aniqlangan.

Hisobot davrida Rossiya, Janubiy Koreya, Buyuk Britaniya, Litva, Bolgariya kabi davlatlarda jami 3 186 nafar O‘zbekiston fuqarosi manzilli ishlarga joylashtirilgan.

Agentlik faoliyatining mehnat migrantlari huquq va manfaatlarini himoya qilish, moddiy yordam ko‘rsatish yo‘nalishida jami 42 mingdan ortiq fuqaroga xizmat ko‘rsatilgan. Shundan, 37 mingdan ortig‘iga maslahat xizmati, 1 900 ga yaqiniga huquqiy, 2 250 ga yaqiniga ijtimoiy, 700 ga yaqiniga moddiy, shundan, 423 nafariga qariyb 22 ming AQSH dollari miqdorida bir martalik moddiy yordam ko‘rsatilgan.

Shuningdek, 28 nafar fuqaro vaqtinchalik xostellarga joylashtirilgan, og‘ir vaziyatlarga tushib qolgan 136 nafar o‘zbekistonlik mamlakatga olib kelingan. Agentlikning xorijdagi vakolatxonalari aralashuvi bilan O‘zbekiston fuqarolariga ish beruvchilaridan 300 ming AQSH dollaridan ortiq miqdorida ish haqlari undirib berilgan.

Mehnat migratsiyasi geografiyasini kengaytirish borasida dunyoning ko‘plab rivojlangan davlatlari vakolatli tashkilotlari va salohiyatli ish beruvchilari bilan muzokaralar olib borilmoqda va fuqarolarni ushbu davlatlarga ishga jalb qilish bo‘yicha erishilgan kelishuvlar hamda bo‘sh ish o‘rinlari haqida qo‘shimcha maʼlum qilinadi.

Bugungi kunda Germaniya, Isroil, Yaponiya, Rossiya, Latviya, Litva, Bolgariya, Polsha kabi davlatlarda tibbiyot, haydovchilik, qurilish, ishlab chiqarish va xizmat ko‘rsatishning turli sohalarida bo‘sh ish o‘rinlari taklif etilmoqda.

Ushbu bo‘sh ish o‘rinlari bo‘yicha xorijiy tillarni biladigan va malakaga ega fuqarolar agentlikka murojaat qilishlari mumkin.

Avvalroq Rossiyada 200 ming nafar o‘zbekistonlik norasmiy ishlayotgani ma’lum qilingandi. Shuningdek, Bandlik va mehnat munosabatlari vazirligi boshqarma boshlig‘i Zohid Asqarov ayrim firibgarlar chet elga ishlash uchun yuborishini aytib fuqarolardan 6 ming dollargacha pul olayotgani, aldanganlar puldan ham, xorijda ishlashdan ham quruq qolayotganini aytgandi.