Ўзбекистонда миллий эмлаш календари асосида одам папиллома вирусига қарши эмлаш бошланди. Бу ҳақда Санитария-эпидемиология қўмитаси ахборот хизмати хабар берди.
Маълум қилинишича, бунинг учун 3138 та эмлаш пунктида тиббиёт ходимларининг тайёргарлиги оширилиб, режага асосан 307 064 нафар 9 ёшдаги қизни эмлаш қамрови жараёни давом этмоқда.
Республика Вирусология ИТИ, Онкология ва акушерлик-гинекология илмий амалий тиббиёт марказлари томонидан олиб борилаётган илмий тадқиқотлар шуни кўрсатадики, агар ВПЧ вакцинаси билан эмлаш ўтказилса келгусида 1100 нафар аёлни бачадон бўйни саратони билан касалланишининг олди олинади, қолаверса, 583 нафар аёлнинг ҳаётини сақлаб қолишга эришилади.
Ўзбекистонда ҳар йили 1660 нафар аёл бачадон бўйни саратони касаллигига чалинаётган бўлса, 608 нафар аёл вафот этмоқда. Касалликнинг профилактикаси 9 ёшдаги қизларни папиллома вирусига қарши эмлаш ҳисобланади. Статистика агентлиги маълумотларига кўра, бачадон бўйни саратони Ўзбекистонда барча ёшдаги аёллар ўртасида кўкрак бези саратонидан кейинги ўринда турадиган ва энг кўп тарқалган саратон касалиги ҳисобланади.
Изоҳ (0)