Инвестициялар, саноат ва савдо вазири Лазиз Кудратов Марказий Осиё ва Хитой ҳудудлари раҳбарлари форуми ўтказишни таклиф қилди. Бу ҳақда вазирлик ахборот хизмати хабар берди.
Маълум қилинишича, 18 апрель куни вазир видеоконференция тарзида Марказий Осиё—Хитой ташқи иқтисодий ва ташқи савдо фаолиятига масъул вазирларнинг биринчи йиғилишида иштирок этган.
Лазиз Кудратов ўз нутқида минтақанинг улкан транзит салоҳиятидан самарали фойдаланиш муҳимлигини, шунингдек, юк ташишнинг узлуксизлигини таъминлаш ва трансчегаравий логистика тармоқларини ривожлантириш бўйича тизимли ечимларни ишлаб чиқиш зарурлигини таъкидлаган.
Ҳудудлараро ривожланишни чуқурлаштириш бўйича ишларни давом эттириш муҳимлиги таъкидланган. Бизнес ҳамжамиятлари ўртасидаги ҳамкорликни мустаҳкамлаш ва янги ўсиш нуқталарини кашф этиш мақсадида 2023 йилнинг иккинчи ярмида Ўзбекистонда Марказий Осиё давлатлари ва Хитой ҳудудлари раҳбарларининг форумини ўтказиш таклиф этилган.
Рақамли савдони кенгайтириш доирасида ўзаро ҳамкорликни фаоллаштириш истиқболлари муҳокама қилинди. “Рақамлаштириш даврида иқтисодиёт ва савдони ривожлантириш дастури”ни ишлаб чиқиш ташаббуси илгари сурилди. Унда минтақа мамлакатлари IT-парклари негизида “Интеллектуал Ипак йўли” қўшма платформасини яратиш кўзда тутилган. Учрашув иштирокчилари имзоланиши режалаштирилган савдо-иқтисодий ҳамкорликни мустаҳкамлаш, минтақа доирасида рақамли савдо соҳасида ҳамкорлик қилиш бўйича меморандумлар муваффақиятли келишилганини мамнуният билан қайд этган.
Изоҳ (0)