Андижон вилоятининг Марҳамат туманида адлия бўлими томонидан туман тиббиёт бирлашмасининг 174 нафар ходимига кечиктирилган таътил пуллари ундириб берилди. Бу ҳақда «Дарё» мухбири Умиджон Мамарасулов хабар бермоқда.
Марҳамат туман адлия бўлими бошлиғи Сардорбек Ҳамроевнинг маълум қилишича, бўлим томонидан туман тибиёт бирлашмасида норматив-ҳуқуқий ҳужжатларнинг ижро этилиши ҳамда меҳнат қонунчилиги талабларига риоя этилиши ҳолати юзасидан юзасидан ўрганиш ва мониторинг ишлари амалга оширилган.
Мониторинг давомида тиббиёт бирлашмаси ҳисобчилари томонидан жорий йилнинг сентябрь ойи учун йиллик меҳнат таътилларига чиққан 174 нафар ходимга октябрь ойига ўтилган бўлса-да таътил пуллари тўлаб берилмаганлиги аниқланган.Ваҳоланки, Меҳнат кодексининг 148-моддаси (таътиллар учун ҳақ тўлаш) 2-қисмида таътил учун ҳақ тўлаш жамоа шартномасида белгиланган муддатларда, лекин таътил бошланмасидан олдинги охирги иш кунидан кечикмай амалга оширилиши белгиланган.
Шунга асосланиб, тиббиёт бирлашмаси бошлиғи номига қонунбузилиш ҳолатларини бартараф этиш юзасидан тақдимнома киритилиб, жами 235 миллион сўм миқдоридаги таътил пуллари ҳисобланиб, тўлаб берилиши таъминланди, — дейди бўлим бошлиғи Сардорбек Ҳамроев.
Изоҳ (0)