Наманган шаҳрида ноқонуний ер савдоси билан шуғулланган шахслар ушланди, деб хабар беради ИИВ матбуот хизмати.
Маълум қилинишича, Наманган шаҳар Янги Наманган тумани “Меҳнатобод” маҳалласида яшовчи фуқаро вилоят ИИБ бошлиғи номига ариза билан мурожаат қилиб, ер савдоси билан шуғулланаётган шахсларнинг ҳаракатлари қонунийлигини текшириб беришни сўраган.
Янгиқўрғон туманида жойлашган фермер хўжалиги балансида бўлган 35 сотихли узумзор боғни 3 минг АҚШ долларига сотишини айтган мазкур хўжалик раҳбари туман ҳокимлигида ишловчи танишлари орқали ҳужжатларни расмийлаштириб беришни ваъда қилган. Ҳужжатлар учун алоҳида 1,3 минг АҚШ доллари, жами 4,3 минг АҚШ доллари талаб қилиб келган фуқарога нисбатан тезкор қидирув тадбири ўтказилган.
Тезкор тадбирда икки нафар шахс аризачидан 34 миллион сўм ва алоҳида 6 миллион сўм пулларни олиб, бу ҳақида тилхат ёзиб берган вақтида ушланган. Ҳозирда ҳолат юзасидан терговга қадар текширув ҳаракатлари давом эттирилмоқда.
Ноқонуний ер савдоси
Шу йилнинг март охирларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Бухорода ҳокимлик захирасидаги 10 сотих ерни сотишга уринган шахс ушланган, Ўзбекистоннинг икки вилоятида ер майдонларини ноқонуний сотмоқчи бўлганлар қўлга олинган эди.
Изоҳ (0)