Хитой компанияси Сирдарёда генетик марказ фаолиятини йўлга қўяди

Сирдарё вилоятида болаларда учрайдиган генетик касалликларни аниқлаш ва ташхислашга ихтисослашган марказ фаолияти йўлга қўйилади. Бу ҳақда “Yuz.uz” нашри хабар берди. 

Қайд этилишича, Ўзбекистон—Хитой қўшма лойиҳаси доирасида ишга туширилиши режалаштирилган генетика маркази йилига 5 минг нафар чақалоқда 48 турдаги скрининг текширувларни ўтказиш, чақалоқларда туғма ва ирсий касалликларни эрта босқичларда аниқлаш ва даволаш имконини беради.

“Хитойда, қолаверса дунёнинг кўпгина мамлакатларида болаларда учраётган генетик касалликларни аниқлаш ва ташхислашда ўз нуфузига эга бўлган BGl Genomies компанияси билан инновацион лойиҳалар асосида ҳамкорлик алоқаларини ўрнатганмиз. Сирдарёга тақдим этаётган янги лойиҳамиз ногиронликка сабаб бўлувчи генетик касалликларни аниқлашга ва ташхислашга мўлжалланган бўлиб, генетик касалликлар сабаб ногирон бўлиб қоладиган болалар сонини сезиларли даражада қисқартириш имконини беради”, — дейди Олий таълим, фан ва инновация вазири ўринбосари Шаҳло Турдиқулова. 

Шу мақсадда, вилоятга ташриф буюрган BGl Genomies Хитой компаниясининг МДҲ давлатлари бўйича вакили Жун Ченг хоним Олий таълим Сирдарё вилоят соғлиқни сақлаш бошқармаси тизимидаги “Она ва бола” скрининг марказига ташриф буюрган.

Улар у ерда, марказ фаолиятини кўздан кечириб, болаларда учраётган генетик касалликларни эрта босқичларда аниқлаш ва ташхислаш юзасидан Сирдарёда олиб борилаётган ишлар билан танишиб, келгусида генетика соҳасини Сирдарёда ривожлантириш, 48 турдаги генетик касалликларни аниқлаш ва ташхислашга ихтисослашган марказ фаолиятини давлат-хусусий шерикчилик асосида йўлга қўйиш масаласи юзасидан Сирдарё вилоят соғлиқни сақлаш бошқармаси тизими вакиллари билан фикр алмашган.

Ўзбекистонда 19 апрелдан илк марта “Боланинг соғлом овқатланиш ҳафталиги” бошланди. Ҳафталик доирасида 208 та кўп тармоқли марказий поликлиника, 1 049 та оилавий поликлиника, 1 080 та оилавий шифокор пунктининг 17,3 мингта тиббий бригадалари ва 34,6 минг нафар патронаж ҳамширалари томонидан 1 миллион 878 минг нафардан зиёд 6-23 ойлик болалар учун уй шароитида тайёрланадиган овқатларни бойитиш мақсадида микронутриент кукунлари топширилади.